Орта школла жангыртыладыла

Май районну администрациясындан билдиргенлерича, муниципалитетни тийресинде юч орта школгъа шёндю тынгылы ремонт этиле турады. Ишле «Билим бериу» миллет проектни чеклеринде бардырыладыла.

Ремонт Майский шахарда экинчи эм бешинчи, сора Александровская элде тогъузунчу номерли мектепледе барады. Ишчиле мекямланы башларын, эшиклерин, терезелерин, инженер коммуникацияларын алышадыла, актовый эмда спорт залларын жангыртадыла. Дагъыда мебель эмда техника сатып алынырыкъды алагъа. Къоркъуусузлукъну жалчытыугъа да бек уллу эс буруллукъду.

Дагъыда бу проектни хайырындан Майский шахарда эмда сагъынылгъан элде бирер жангы орта школ ишлене турады. Шахардагъында – 300, элдегинде уа – 200 жерлери боллукъду. Районну жамауат совети ишлеге дайым кёз-къулакъ болады.

«Къабарты-Малкъарда билим бериуню айнытыу» деген къырал программаны чеклеринде Бахсан шахар округда 5-чи эм 7-чи номерли мектепле жангыртыла турадыла. Алада да башында сагъынылгъан школладача аллай мадарла этилликдиле, арбазларына уа плитка да саллыкъдыла. Хар не да шёндюгю излемлеге келиширча, окъуу тап, иги барырча этилликди.