Будайны орунуна – спирт

Россейни МВД-сыны Май районда бёлюмюню следовательлери 31-жыллыкъ инсаннга ачылгъан терслеу материалланы тинтип бошагъандыла. Ол законлагъа бузукълукъла этип, спирти болгъан продукцияны ташыгъаны ючюн терсленеди. Ичгини ауурлугъу 38 тоннагъа жетгенди, аны битеулю  багъасы 2,3 миллион сомдан озгъанды, деп билдиргендиле КъМР-де МВД-ны пресс-службасындан. 

2022 жылда ноябрьде жол-патруль службаны къуллукъчулары эр кишини Прохладный-Эльхотово жолда тыйгъандыла. Аны ауур жюклю машинасында полициячыла эки цистерна тапхандыла, аланы ичлеринде суусун зат болгъанды. Аны ийиси спиртге ушагъанды. Цистерналаны букъдурур умут бла аланы башындан будай къуюлуп эди.

Тинтиуледен  сора тохташдырылгъаныча, спирти болгъан суусун зат ГОСТ-ха келишмейди, аны кючлюлюгю 95 градусха жетмегенди. Соруу бардырылгъан кезиуде ишекли продукцияны къоншу региондан Шимал-Кавказ округну башха субъектине элтгенин айтханды.

Бу шартла бла байламлы РФ-ни УК-сыны 171.3-чю статьясыны 2-чи кесегини «б» пунктуна кёре терслеу материалла ачылгъандыла. Уголовный иш къабыл кёрюлюп, сюдге берилгенди.

Тикаланы Фатима хазырлагъанды.
Поделиться: