Жангы болумгъа келиширча

Кёп болмай, Къабарты-Малкъар къырал университетде тыш къыралланы келечилери да къатышып, «Жангы болумда - экономика, менеджмент эм право» деген  аты бла  миллет илму-практика  конференция болгъанды.  Анга  КъМКъУ-ну права, экономика эм финансла,  менеджмент, туризм эм къонакъ алыу  индустрия институтлары, Россейни регионларындан   къырал власть органла, жер-жерли  самоуправленияны, бизнесни, илмуну,  муниципалитетлени,  Индонезияны, Белоруссияны, Къыргъызстанны, Абхазияны келечилери да къатышхандыла.  

Форумгъа очно эм  заочно халда  экономика бла байламлы илму, менеджмент, права эм технология жаны бла магъаналы сорууланы сюзгендиле. Аны магъанасы жамауатны болумун игилендирирча,  экономиканы айнытырча  къыйматлы проектлени табаргъады. 

Жыйылыуну ача, КъМКъУ-ну ректоруну къуллугъун толтургъан  Юрий Альтудов, келир он жылланы ичинде жамауатны  уллу тюрлениуле сакълагъанларын белгилегенди.  

- Къыралны экономикасын  айнытырча тюрлю-тюрлю  амалланы юсюнден сюзерге керекди.  Къыралны,  бизнесни эм жамауатны арасында да байламлыкъ къуралыргъа тийишлиди. Аны бла бирге бийик билим бериуню  системасыны архитектурасы да тюрленеди. Бу жол  конференцияда  экономика, менеджмент, права  эм  технология жаны бла да проблемала эм илму проектле да сюзюллюкдюле.  Форумгъа къатышханлагъа экономиканы эм жамауатны айнытыуда да къыйматлы амалла табарларын тежейме, - дегенди  Юрий Камбулатович.

Конференцияны магъаналыгъын РФ-ни  экономика политика жаны бла  департаментини таматасы  Аслан Канукоев эм КъМР-ни экономика министри Рахайланы Борис да белгилегендиле. 

- Бусагъатда Россейде  къыйын болумгъа да къарамай, къырал жашайды, ёседи, бютюнда эски жерлерин  ызына къайтарыргъа онг табылгъаны къууандырады.  Ол шарт артыкъ кере жамауатны бирикдирирча себеплик этеди.  Биз  2030 жылда кесибиз чыгъаргъан  бийик технологиялы товарланы 75 процентин хайырланыргъа  керекбиз.  Бюгюнлюкде  регион эм  федерал даражада илму жаны бла къыйматлы проектле  жашауда  бардырылырча   уллу магъана бериледи. Аны чеклеринде   Къабарты-Малкъарда быллай къыйматлы проектлени белгилерчады: Элбрус курорт, Тырныауузда вольфрам-молибден комбинат, «Чегем Агро» теплица комплекс, «Восточный» бла «Мэй» микрорайонла. Саулай алып айтханда, проектлени багъасы  140 миллиард сомгъа жетеди. Аны ёлчемине, керек болса, къошула барлыкъды.     Дагъыда бир магъаналы проект КъМКъУ бла бирге бардырылгъан  Бийик технологиялы паркны къурау  бла байламлыды.  Ол шарт технологияла мурдорну игилендирирге эм айнытыргъа болушурукъду.  Бусагъатда университет  бийик квалификациялы кадрланы къурау жаны бла баш борчну толтурады, - деп билдиргенди Борис Магомедович.

 Пленар кенгешни кезиуюнде тематика бла байламлы, тюрлю-тюрлю соруулагъа жоралап, докладла этилгендиле.  Ала  правону мардалары; къыралны,  жамауатны къоркъуусузлугъун  жалчытыу эм жангы болумда суверенитетни сакъларча   уголовный  законодательствону игилендириу; гитче эм орта предпринимательствода кадрла жаны бла политика;  аудитор ишни магъаналыгъы; финанслагъа  къырал (муниципал) контроль бардырыу эм башха соруулагъа жораланнгандыла.  

 Анда спикерлени орунунда   Индонезиядан ислам институтну проректору, философияны доктору Абдул Азиз Ибрагим, монополиягъа къажау федерал  службаны  бёлюмюню таматасы  Анна Кумахова, "КБ ВЭО" регион жамауат биригиунютаматасы Пшикан Таов, республиканы  прокуроруну орунбасары  Сергей Белов, сатыу-алыу палатаны  таматасыны орунбасары  Павел Сидорук эм башхала да сёлешгендиле. 

Форумну экинчи кюнюнде, тюрлю-тюрлю  соруулагъа жоралап, жети секция ишлегенди. Ол санда КъМКъУ-ну «ЮНЕСКО»  кафедрасы къатышып «Халкъла аралы байламлыкъла:  экономика, право, билим бериу, илму эм маданият» темагъа жораланнган  секция ингилиз тилде баргъанды. Анга Индонезиядан  Тазкия ислам институтну келечилери да тири къатышхандыла. 

Конференцияны ахырында   резолюция жарашдырылгъанды, этилген  докладла уа илму жыйымдыкъгъа кийирилгендиле.