Жол жанларында аш-азыкъ сатып алыу къоркъуулуду

Жол жанларында аш-азыкъ сатып алыу къоркъуулуду. Эркинликсиз сатыу бардырылгъан жерледе санитар-эпидемиология жорукълагъа, ветеринар-санитар излемлеге да бузукълукъ этилмей къалмайды. Аны хатасындан а аллай адамладан абери алып ашагъан инфекциялагъа боялыргъа неда ууланыргъа боллукъду. Жаланда жол жанларында угъай, автобусла тохтаучу жерледе, рынокланы къатларында, вокзаллада, жер тюбюнде переходлада, кёп фатарлы юйлени арбазларында да керекмейди абери сатып алыргъа. Ол сизни, юйдегилеригизни да саулугъугъузгъа къоркъуулуду, дейдиле специалистле.

Аллай жерледе сатыу этгенлени къолларында медицина китапчыкълары хазна болсун, ол адамла тазалыкъны сакълау жорукъланы да билмейдиле. Продукцияларыны уа къайдан чыкъгъаныны, качествосуну, къоркъуусузлугъуну юсюнден бир тюрлю документлери болмаучуду.

Дагъыда къолдан сатыу этгенлени саулукъларына, аланы товарлары къайдан келгенине бир киши да контроль этмейди. Аны себепли алада болгъан продукцияны качествосуна эмда къоркъуусузлугъуна кимле жууаплы болгъанын да табарыкъ тюйюлсюз. Айтханыбызча, быллай жерледе сатылгъан продукция ууландырыргъа, дизентерия, сальмонеллёз, туберкулёз, ботулизм эмда башха ауруулагъа келтирирге боллукъду. Быллай инфекцияла бютюн терк эт эмда сют продукцияда, сора чабакълада жайыладыла. Къайнатылмагъан сют, андан этилген ашарыкъла уа бегирекда къоркъуулугъа саналадыла. Быллай жерледе къолдан дагъыда тауукъ жумуртхаланы, жууаланы, консерваланы, къатхан чабакъланы да алыргъа керекмейди.