Газ бла жалчытыуну соруулары сюзюлгендиле

«Единая Россия», «Газпром межрегионгаз» эмда  «Московский комсомолец»   «Газны хар юйге да» проектни башлагъандыла. Аны чеклеринде газетни  сайтында жашау журтланы газ бла жалчытыуну юсюнден оюмла, соруула, алагъа жууапла, сейир шартла басмаланырыкъдыла. Бу  иш къыралны инсанларына проектни юсюнден толу хапар берир ючюн башланнганды, деп ангылатханды «Единая Россияны» генсоветини секретары Андрей Турчак Владимир областьха ишчи жолоучулугъуну кезиуюнде.

- Адамла программагъа киргенде чырмаула болмагъанларын, бу къырал себепликге  эркин  къауумланы юслеринден толу хапарлы болургъа керекдиле,-деп къошханды ол.

«Газпром межрегионгаз» обществону башчысы Сергей Густов программаны жашауда бийик даражада бардырыр ючюн жамауат аны энчиликлерини бла жорукъларыны юслеринден билирге кереклисине эс бургъанды. «Адамланы сорууларына жууапланы терк  бериу магъаналыды. «Газны хар юйге да» проектни да ол мурат бла башлагъанбыз»,-дегенди ол.

 Владимир областьда бардырылгъан битеуроссей кенгешде уа 2021-2025 жыллада  РФ-ни субъектлерин  газ бла жалчытыу программа къалай тамамланнганы,   инфраструктураны болуму сюзюлгенди.

 Аны аллында уа   Андрей Турчак Суздаль районда   Барское Городище элде газ ызны ачылыууну къууанчына къатышханды. Элде 75 юй барды, газ ызлагъа уа аладан  39 къошулгъанды.  Жылны ахырына дери уа юйлени барысын да табийгъат байлыкъ бла жалчытыргъа борчла салыннгандыла.

Газны хакъсыз юйню тийресине дери жетдириуню юсюнден законнга РФ-ни Президенти   2021 жылда къол салгъанын эсгертирге сюебиз. Анга къошулургъа сюйгенле Госуслуги порталны онглары бла хайырланыргъа боллукъдула. Дагъыда бу жумушланы МФЦ-да,  «Газпром межрегионгаз» организацияны бёлюмлеринде, газ бла жалчытхан компанияланы сайтларында толтурургъа боллукъду. Партия бу къырал себепликни кенгертирге, инсанланы бир-бир къауумларына газ бла жалчытыу оборудованиягъа багъалагъа марда тохташдырыргъа  башламчылыкъ этгенди.

Бу жумушланы тамамлаугъа  регионланы башчылары жууаплыдыла. Ала газ бла жалчытыу штаблагъа башчылыкъ этедиле. Алгъаракълада уа   «Газпром межрегионгаз» обществону таматасы  Сергей Густов  КъМР-ни  Башчысы, партияны регион бёлюмюню оноучусу    Казбек  Коков бла тюбешиуде тарифлени тохташдырыу бла бирге газ бла жалчытыу программаны да сюзген  эдиле.

Андан сора Правительствону башчысыны биринчи орунбасары   Муаед  Кунижев бла тюбешиуде да къаралгъанды бу соруулагъа. Бюгюнлюкде уа Къурулуш эм жашау журт-коммунал  мюлк министерство республиканы шахарларын бла эллерин жылыу бла жалчытырыкъ регион операторну къурауну мадарларын хазырлагъанды.  

- 2021-2025 жыллада КъМР-ни газ бла жалчытыу жаны бла жангыртылгъан программагъа тийишлиликде, Май районда Баксанский элге эмда Черек районда Бызынгы элни тийресинде  альпинист базагъа газ ызланы тартыуну жумушлары кийирилгендиле.   Дагъыда Элбрус районда Тырныауузда магъадан чыгъарылгъан жерде  да тартыллыкъдыла ызла»,-деген эди ол кезиуде   Сергей Густов.

Тикаланы Фатима хазырлагъанды.
Поделиться: