Жашауда керек затлагъа юйреннгендиле

Къабарты-Малкъарны къырал аграр университетини къурулуш эмда жерлени жарашдырыу, механизация эмда предприятияланы энергия бла жалчытыу бёлюмлеринде юйретиу тренингле бардырылгъандыла. Ала предпринимательство бла байламлы эдиле. Вузну пресс-службасындан билдиргенлерине кёре, алагъа къатышханлагъа жюзден артыкъ сертификат берилгенди. Саулай айтханда уа, окъуугъа 320 студент эмда магистрант къатышханды. Ала предпринимательствону юсюнден билимлерин байыкъландыргъандыла, бизнесни жетишимли бардырыуну энчиликлери бла шагъырейленнгендиле. Окъууда бирсиледен тири болгъанланы саугъала бла да белгилегендиле.

Бу ишге къатышырча «Предпринимательство компетенцияланы юсюнден тренингле» деген платформада регистрацияны ётерге керек эди. Аны уа технологиялы предпринимательство жаны бла усталаны хазырлау эмда онгланы ачыкълау федерал проектни чеклеринде къурагъандыла. Бардыргъан а Москваны физика-техника институту (МФТИ) этеди.