Жерлени битимлилигин игилендириу амал

КъМКъАУ-ну агрономия факультетинде «NO-TILL – жерлени битимлилигин сакълау амал. Россейни бла Аргентинаны сынамы» деген илму-практика семинар бардырылгъанды бу кюнледе. Аны ишине КъМР-ни Эл мюлк министерствосуну, РАН-ны КъМР-де илму арасыны эл мюлк институтуну, республиканы агрохимия службасыны, университетни эмда «Престиж-К», «Современные агротехнологии» эм «Агрогалактика Дон» предприятияланы келечилери къатышхандыла. Тышындан келген къонакъланы санында Москва, Белгород, Ростов областьладан, Краснодар эмда Ставрополь крайладан,  СКФО-дан эмда Кърымдан эл мюлк товарла чыгъарыучула бла илму-педагогика ишчиле бар эдиле, деп билдиргендиле вуздан.
«No-Till» деп жерни жарашдырыу технологиягъа айтадыла. Ол шёндюгю амалды. Анда жерни сюрмейдиле, жаланда юсюне ууакъ тартылгъан битимлени жайып къоядыла. Семинаргъа къатышханла аны – жерни сюрюуню къоюп къойгъанча алай бошуна ангыларгъа жарамагъанын, ол, бек биринчиден, бийик технологиялы амал болгъанын, кесине билимли, уста специалистлени излегенин белгилегендиле. Айтылгъаныча, «No-Till» сингдирилген жерде эл мюлк ишлеге къоранчланы иги да азайтыргъа болады. Аны юсюнден семинарны кезиуюнде Аргентинада специалистле бла бардырылгъан видеоконференцияда да сагъынылгъанды.

Улбашланы Мурат.
Поделиться: