Хыйлачыгъа 24 миллион сом тюшгенди

КъМР-де эл мюлкледен бирини алгъыннгы таматасы, хыйлачылыкъ этип, 24 миллион сом къоллу болгъанына ишеклик барды.

Республиканы право низамны сакълаучу органларына эл мюлк сферада ишлеген лизинг компанияладан бирини келечилери тарыкъгъандыла. Аланы айтханларына кёре, Чегем районда эл мюлк-промышленный кооперативни алгъыннгы таматасы финанс аренда келишимге кёре бёлюннген тёлеулени урлагъанды.

Районну полициячылары тинтиу жумушла бардырып, 2012 жылда мюлкню башчысы жыйылыу бардырып, аны таматасына алгъыннгы ишчисин айыртханын тохташдыргъандыла. Алай анга уа бу оноу белгили этилмегенди.

Ызы бла мюлкню алгъыннгы башчысы кесини орунуна салгъан адамны атындан лизинг компания бла 400 мал сатып алыуну юсюнден келишим этгенди, анга къол ызны да кеси салгъанды.  Битеу да бирге анга 23 миллион 991 минг сом  бёлюннгенди.

Бу шартла бла байламлы РФ-ни УК-сыны 159-чу статьясыны 4-чю кесегине кёре (хыйлачылыкъ) уголовный иш жарашдырылгъанды. Анга кёре терсленнгенни эркинлиги он жылгъа дери сыйырылыргъа боллукъду.

Тикаланы Фатима хазырлагъанды.
Поделиться: