Бахчаны сакълауну амаллары

Кеслерини бахчаларында топуракъны, кёгетлени, жемишлени ууландырмаз ючюн адамла химия дарманланы не къадар аз хайырланыргъа кюрешедиле. Алай бир - бирде тирликни жокъ этип ийген, битимлени унукъдургъан заранчылагъа бла ауруулагъа уа не амал?

Аны бла байламлы бизни ата-бабаларыбыз хайырланып тургъан бир къуум мадарланы эсге салыргъа сюебиз. Сёз ючюн,  къызыл  къумурсхала тля къуртчукъланы араларында хайырланыучу себепли, аланы жемиш тереклени битеу бутакъларына жайып, алагъа заран саладыла. Аланы тыяр ючюн  терекни тюп жанына кюлню къалын къуяргъа керекди. Дагъыда анга сууда эритилген тузну къошса уа бютюнда иги болады.

Терекни тюп жанын мел бла ызласа да игиди. Ол аланы къумурсхадан къоруулайды. Аллай ызлыкъны юс юла ала ёталмайдыла эмда ол аланы жолларындан ажашдырады. Сора помидор башладан неда дугъумадан жипле кибик этип терекни тюп жанын чулгъаса, къумурсхала аладан да къоркъадыла. Нек дегенде аланы ийислерин кётюралмайдыла . Дагъыда ала аслам жюрюген жерге чеплеу жауну  суу бла къатышдырып къуйса да, думп болуп кетедиле. Жаз башында ала  жайылыучуларын эсге ала, бу мадарла хайырлы болурла сизге деп ышанабыз.