Сыйы-намысы бийикде

Бу кюнледе республиканы жамауаты Къабарты-Малкъарны, Къарачай-Черкесни да халкъ поэти Зумакъулланы Танзиляны туугъан кюнюн белгилейди. Хар бир таулу юйюрде китаплары сыйлы жерледе тургъан, республикадан узакъда да сыйы-намысы бийикде жюрюген шайыргъа жюрек сёзлерин айтханла, айхай да, кёпдюле. Айтырыкъла уа – аладан да аслам. Газетни редакциясына аны бла байламлы иги кесек къагъыт келгенди. Аладан бир къауумун, Танзиляны, аны поэзиясын да къалай сюйгенлерин назмула бла айтханланы да энчи, окъуучуларыбызгъа белгили этебиз. 

-Танзиляны мен битеу да аны ызындан келген назмучуланы устазларына санайма. Аны таныгъаным. аны бла бетден бетге сёлешгеним  уллу насыпды манга. Анга айталмай тургъан ёхтемлигим а бу назмудады.

ТАНЗИЛЯ

 Зумакъулланы Танзилягъа

Жазгъанынгы окъуйма мен жаратып,
Болмаз сенден ариу  сёзлю бир адам.
 «Танзиля!» – деп, атынгы ёхтем айтып
Андан турады сени саулай алам.
                
Сен кёл салып жазаса жазгъанынгы,
Поэтлеге юлгю болгъанса андан.
Сюеме мен сени назмуларынгы
Не кюнде да китап ачып, окъусам.

Миллет ёхтемлигибизсе сен бизни,
Ариу сёзлю, татлы тилли Танзиля,
Жарыкъ кёллю эгечибизсе бизни,
Энтта кёп жылланы тур назму жаза! 

Бейтуугъанланы Исмаил, «Минги тау» журналда бёлюмню редактору:

ШАЙЫР ТАНЗИЛЯ

Малкъар халкъны ийнагъы, 
Дуния айтхан жырларын, 
Шайыр, поэт Танзиля,
Къатла назмула, жырла!

Тыпыр ташынг – Малкъарынг, 
Анда сени тамырынг. 
Туугъан жеринг – Гирхожан, 
Тау тюбюнде орналгъан.

Сабийлигинг – сюргюнде, 
Тюшдю ачлыкъ кёрюрге,
Кёп азапла сынадынг, 
Жашлай нечик къыйналдынг!

Андан келесе, асыу
Таба этгеннге жарсыу 
Назму тизгинлерингде –
Бизге тизгенлерингде.

Махтау санга, Танзиля!
Туугъанса сен халкъынга, 
Сёзюнг ушап балхамгьа.
Узакъ ёмюрле атла,
Узакъ айтыла атынг,
Нюрлю болуп сыфатынг!
  Алтууланы Зухра, Нальчикни 3-чю школуну устазы: