Жаш авторлагъа себепликге – магъаналы проект

Къабарты-Малкъарны Жамауат палатасында «Живое слово» проект бардырылып башлагъанды, аны чегинде биринчи тюбешиуге битеу республикадан 60-дан аслам адам къатышханды.

Проектни мураты тёрели россейли тин-ниет байлыкъланы, республиканы миллет-маданият энчиликлерин сакълауду, Ата журтха сюймекликге бла ариу ниетлеге юйретиудю, Россейни халкъларыны бирликлерин кючлеудю. Анга юйретиу семинарла, жаш поэтлени бла прозаиклени конкурсу, ай сайын бардылыучу «тёгерек столла» киредиле, авторланы чыгъармалары Жамауат палатаны официал сайтында бла асламлы информация органлада басмаланадыла. Палатаны маданият, тин хазнаны сакълау эм асламлы информация органла жаны бла комиссиясыны башчысы Атмырзаланы Магомет белгилегенича, проектни борчу дагъыда жамауатны эсин  жазыучулукъ бла кюрешген жаш адамлагъа бурдурургъады.

- Россейни Президентини «Тёрели россейли тин-ниет байлыкъланы сакълауда къырал политиканы мурдорун бегитиуню юсюнден» буйругъун толтуруу бла байламлы республиканы чыгъармачылыкъ жаш тёлюсюне – жазыучулукъ, сурат алыу бла кюрешгенле, композиторла - къайгъырыуну дурус кёргенбиз. Республикабызны миллетлери багъалагъан тин хазна аланы тин, тарых, маданият айныуларында эсленеди, алагъа уа, бек биринчи, туугъан жерге сюймеклик, юйюрню багъалау билиу киредиле, жаш авторлагъа илхам берген да аладыла, - дегенди Атмырзаланы Магомет.

 Жыйылгъанлагъа алгъышлау сёзлерин республиканы халкъ поэти Беппайланы Муталип, профессор Людмила Шауцукова, Суратчыланы союзуну башчысы Жанна Канукова айтхандыла. Палатаны башчысыны болушлукъчусу «Кабардино-Балкария» ГТРК-ны телеоператорларыны къауумуну таматасы Руслан Тхагазитов проектни юсюнден телевиденияда бериулени айгъа бир кере кёргюзтюрюклерин билдиргенди.

Тюбешиуню къурагъан «Социо-маданият проектлени арасы» организацияны башчысы Юлия Ордокова белиглегенича, «Живое слово» проектни чегинде алты тюбешиу боллукъду. «Аланы хар бири да лекциядан башланырыкъды – республикада искусствону белгили къуллукъчулары бизде адабият, сурат ишлеу, театр, кино къалай жаратылгъанларыны юсюнден айтырыкъдыла. Жыйылыулада чыгъармачылыкъны бюгюннгю халы эм айныу жоллары тинтилликдиле, жаш авторла къаллай чурумлагъа тюбегенлери, алагъа болушлукъ этиуню амаллары сюзюллюкдюле. Юйретиу семинарла бла энчи юйретиуле да боллукъдула. Бу ишлеге себепликни уа маданият жаны бла билим берген учрежденияла, музейле, театрла бла концерт залла этерге хазырдыла», - деп къошханды ол.

Тюбешиуле хар айны ахыр бараз кюнюнде ётерикдиле, деп билдиредиле Жамауат палатаны пресс-службасындан.

Кульчаланы Зульфия.
Поделиться: