Тийишли болмагъан тёлеулени алгъанланы – къаты жууапха

Бир-бир болумлада адамны РФ-ни Пенсия фонддан (ПФ) тёлеулени алыргъа эркинлиги тыйылады. Анга талай сылтау барды, сёз ючюн, инсан ишге чыкъса, неда сакъатлыгъы кетсе. Аллай кезиуледе ол фондха, берилген тёлеулени тыяр ючюн, болуму тюрленнгенини юсюнден билдирирге керекди.

ПФ-дан келген пособияланы асламысы социальный тёлеуледиле, кёбюсюнде ала адамны иши жокъ эсе неда ол социальный магъаналы жумушла бла кюреше эсе, бериледиле. Аллайлагъа ишлемеген пенсиячыланы айлыкъларын жашау этерге керекли ахчаны эм аз ёлчемине жетдирир ючюн берилген къошакъ ахча, сакъат сабийлеге неда абадан адамлагъа къарагъаны ючюн берилген тёлеуле да саналадыла. Алай инсан ишге киргенлей, аны ючюн иш бла жалчытхан организация фондха страховой тёлеуле этип башлайды, аны бла адамны пособиялагъа эркинлиги да сыйырылады.

Экинчиси, ёксюз сабийге 18 жылы толгъунчугъа дери пособияла бериледиле, ол окъуугъа кирмей къалса, ала тыйылыргъа тийишлидиле. Студент болуп, окъуудан кетсе неда къысталса, окъууун бошап, дипломун алса, тёлеуле бериллик тюйюлдюле. Сакъат неда къарт адамгъа къарагъаннга да, башда сагъынылгъаныча, ол ишлемей эсе, фонддан ахча бериледи. Алай, саусуз ёлсе, аны пособияны алыргъа эркинлиги болмай къалады. 

Быллай эм тёлеуле берилирге тийишли болмагъан кезиулени юсюнден инсан фондха заманында билдирмесе, анга артыкъ ахча келип турлукъду. Аны бла байламлы ПФ письмо бла артыкъ тёленнген ахчаны къайтарырыгъызны юсюнден билдирликди. Ол излем толтурулмаса, ахча сюдню юсю бла алынырыкъды.