Тёрт жюзден аслам пилотну жараусузгъа тергегендиле

 Россейде граждан авиациягъа пилотланы хазырлау бла байламлы болум амандан-аман бола барады. Генеральный прокуратураны эсеплерине кёре, бир жылны ичинде тюрлю-тюрлю халатла жибергенлери ючюн ишлеринден 425 пилот эркин этилгендиле, эки авиация юйретиу ара жабылгъанды. Чурумла асламысында аланы юйретиуде кемчиликле болгъанлары ючюн чыгъадыла.

Прокуратураны официальный келечиси Александр Куренной белгилегенича, бюгюнлюкде самолётлада учууну къоркъуусузлугъун жалчытыугъа уллу эс бурулады, ол себепден пилотланы усталыкълары да дайым тинтиледи. Алгъаракълада «Правительстволу сагъатда» доклад эте, генпрокурор Юрий Чайка 2017 жылдан башлап прокурор тинтиуледен сора ишлеринден 550 пилот къысталгъанларын билдирген эди. Андан тышында, учуу персонал хазырланыуну программасын толусунлай ётмеген кезиуле болгъанлары, билим бериу организациялада кадрла, мюлк жаны бла керекле да жетишмегени да ачыкъланнганды. Тарихле бек аман тюйюл эселе да, сагъайыргъа уа керекди, дегенди ол. 

Avia.ru порталны баш редактору Роман Гусаровну оюмуна кёре, проблеманы тамыры эскирген юйретиу системагъа кетеди. Бизде пилотланы кёп заманны, аслам ахча къоранч этип юйретедиле, алай аланы билимлерини качествосу уа къууандырмайды. Беш жыл юйреннгенден сора, курсантла самолётну тийишлисича учуралмайдыла. Ол угъай, ала дипломларын алгъандан сора авиакомпанияла кеслерини ахчаларына усталыкъларын андан ары ёсдюредиле. Тыш къыраллада уа лётчикле окъууларына кеслерини хуржунларындан тёлейдиле, аны ючюн аланы билим алыугъа кёз къарамлары да башхады, дейди ол.

Эксперт Олег Пантелеев россейли граждан авиацияда лётчиклени азлыгъы, кёпле ишден саулукълары осал болуп неда жыл санлары жетип кетгенлери бла да байламлыды, деп ойлайды. Сора, тыш къыраллагъа анда иш хакъ асламыракъ тёленнгени ючюн кёчгенле да аз тюйюлдюле. Ары уа кёбюсюнде сынамлы, башха тиллени да билгенле чакъырыладыла. Быллай болумлада надзор органла тинтиуле бардыргъанлары сфераны халын бютюн къыйын этеди. Авиакомпанияла пилотланы кеслеринде къалдырырча аланы айлыкъларын кёбейтирге кюреширикдиле, ол проблеманы бир кесек селейтирикди, алай аланы кеслерине уа уллу къоранчла келтирликди. 

Граждан авиацияны эм хауаны хайырланыуну юсюнден келишим тауусхан къыралланы араларында Россей авиацияда къыйын болумланы саны бла алчы жерледеди. Къыралла аралы авиация комитетни эсеплерине кёре, 2018 жыл бла тенглешдиргенде, былтыр авиакатастрофалада ёлгенлени саны 2,5 кереге кёбейгенди. Аны бла бирге, Россей авиациядан билдиргенлерине кёре, самолётла бла учханланы саны ёсе барады. Быйылны январь-май айларында россейли авикомпанияла 44,88 миллиондан аслам пассажирни ташыгъандыла, ол а былтырны бу заманы бла тенглешдиргенде, 12,3 процентге кёпдю.