Къыйын ауругъан сабийлеге болушадыла

Жашауларына къоркъуулу эмда къыйын  аурууладан, ол санда бек аз тюбеген патологияладан   саусуз сабийлеге болушлукъ тапдыргъан  «Круг добра» фонд энди жюреклери ауругъанлагъа да билеклик этеди.   Анга кёре   биринчи операцияла да бардырылгъандыла. Саулай алып айтханда,  бюгюнлюкде фонд  жетмиш тюрлю ауруудан багъылырча  себеплик тапдырады. 

Кардиология бла байламлы  жангы ауруулагъа бир жылны ичинде къараллыкъды. Алгъаракълада  бир-бир ауруулагъа   борчлу халда медицина страхование бла   бийик технологиялы медицина  болушлукъгъа   чек салыннган эди.  Бусагъатда бийик технологиялы медицина болушлукъ  берилирча ахчаны толусунлай   «Круг добра» фонд кеси тёлейди.  Жууукъ заманда Фонд  къырал программала бла хакъсыз багъылмагъан   жюрек ауруулары бла туугъан гитчелеге   болушлукъ тапдырылырча мадар этерикди.

- Бюгюннгю илму бла медицина   жерлеринде сюелмейдиле. Терк эм дарманла бла багъарча   бийик технологиялы амалла хайырланыладыла эм биринчи заманда  окъуна жюрек аурууну тинтирча диагностика этиледи. 

Жангы  медицина оборудование къысха заманнга  эм игилерине алышыннганды. Аны бла бирге гитче саусузланы болумларын игилендирирча жангы дарманла да къураладыла,- дейди Бахсан районну ара больницасыны   врач-кардиологу  Зарема Канкулова.

Эсге сала айтсакъ,  «Круг добра» фонд  РФ-ни Президенти Владимир Путинни буйругъу бла  2021 жылда къуралгъанды. Бусагъатда ол ёлюмге келтирирге боллукъ эм къыйын ауругъан сабийлеге тийишли халда багъылырча онгла къурайды, ол санда къоранчланы да кеси боюнуна алады. 

Бизни корр.
Поделиться: