Муратларына жеталмагъандыла

Къуллугъун кесине таплыкъгъа  хайырланнганына ишеклик барды

Экономикада аманлыкълагъа къажау мадарланы толтургъан кезиуде РФ-ни ФСБ-сыны КъМР-де Управлениясыны къуллукъчулары  Бахсан районну эллеринден бирини алгъыннгы башчысыны аманлыкъ ишин тохтатхандыла. Ол къуллугъун оздуруп бла хайырланнганына ишеклик барды.

Белгили болгъаныча, терсленнген законлагъа бузукълукъла этип, эл мюлк жумушлагъа жараулу жерни (кенглиги 94 гектар) кадастр эсепге салмай, конкурс ишле бардырмай, арендагъа бергенини юсюнден келишимни хазырлагъанды, деп билдиргендиле бизге кюч ведомствону пресс-службасындан.

 РФ-ни СК-сыны КъМР-де следствие управлениясы   Россейни УК-сыны 286-чы статьясыны 2-чи кесегине бузукълукъла этилгенлери бла байламлы терслеу материалла ачханды.  Законннга кёре, быллай аманлыкъ этгенни эркинлиги 7 жылгъа дери сыйырылыргъа боллукъду.

Отлукъну урларгъа умут этгендиле

Экономикада бузукълукълагъа къажау мадарланы тамамлагъан кезиуде РФ-ни ФСБ-сыны КъМР-де Управлениясыны келечилери «РЖД» акционер обществону «Шимал Кавказда темир жолла» бёлюмюню юч ишчиси  отлукъну урларгъа умут этгенлерин ачыкълагъандыла.

РФ-ни СК-сыны КъМР-де следствие управлениясы   Россейни УК-сыны 30-чу статьясыны 3-чю кесегине, 158-чи статьясыны 2-чи кесегини «а» пунктуна бузукълукъла этилгенлери бла байламлы терслеу материалла ачханды.  Законннга кёре, быллай аманлыкъ этгенни эркинлиги 6 жылгъа дери сыйырылыргъа боллукъду.

 Айлыкъ тёлеу тизмеге жалгъан шартла кийиргенди

Экономикада аманлыкълагъа къажау мадарланы толтургъан кезиуде РФ-ни ФСБ-сыны КъМР-де Управлениясыны къуллукъчулары  Лескен районда орта билим берген учрежденияладан бирини бухгалтерини бузукъчу ишин тохтатхандыла. Ол бюджет ахчаны  урлаугъа къатышханына ишеклик барды, деп билдиргендиле бизге кюч ведомствону пресс-службасындан.

 Ачыкъланнганыча, ол 2019 жылдан 2021 жылгъа дери кезиуде къуллугъун кесине таплыкъгъа хайырланып, айлыкъны тёлеу документлеге жалгъан шартланы кийиргенди. Алай бла ол бюджет ахчаны урлагъанды.

РФ-ни СК-сыны КъМР-де следствие управлениясы   Россейни УК-сыны   159-чу статьясыны 3-чю кесегине эмда 292-чи статьясыны 2-чи кесегине  бузукълукъла этилгенлери бла байламлы терслеу материалла ачханды.  Законннга кёре, быллай аманлыкъ этгенни эркинлиги 6 жылгъа дери сыйырылыргъа боллукъду.

Тикаланы Фатима хазырлагъанды.
Поделиться: