Бурун адамланы ичгичиликден къалай тыйгъандыла

Тыш къыраллада, эрттегили Грецияда, не тюрлю ичги да болсун,эсириу бек сылыкъ ишге саналгъанды. Айтхылыкъ Платонну оноуу бла къабыл этилген законнга кёре, 18 жылы толмагъан адамны ичги ичерге эркинлиги болмагъанды.

Жазыучу эм тарыхчы Плутархны «Ичгичиле дуниягъа ичгичилени келтиредиле» деген эсли сёзюне кёре, аллай адамланы юйлерини къабыргъаларына ичгичи деп жазып болгъандыла. Аллай журтлада жашагъан адамла бла байламлыкъ жюрютюу, жууукъгъа байлашыу ыспассызлыкъгъа саналгъанды.

Эрттегили Римде къулларын ичгиден тойдуруп, эсиртип,жайыкъгъынчы тышына чыгъарып, жамауатха кёргюзте болгъандыла. Алай бла ичгиден кёллерин къачыргъандыла. Эрттегили Спарта къыралда уа, къаллай да болсун, ичги къулланыкъыды деп, алай санагъандыла.

Къытайны императору Ву Ванггну 1220 жылда чыгъаргъан буйругъуна кёре, ичгичиликге берилген адамны ёлтюрген этгендиле.

Эртте заманда Грецияда ичгиге берилип, ахшы адетлерин тас этмез ючюн, энчи ишчи къауум айыргъандыла. Ала ичгиге жан ата тебиреген адамланы, бютюнда жаш адамлагъа бла тиширыулагъа аяусуз жаза тартдыргъандыла.

Эртте заманлада Англияда (7-10 ёмюрледе) ичгичилени боюнларына хамут кийдирип, шахарны ара орамларында ары-бери айландырып, адамлагъа кёргюзтгендиле. Эр киши 30 жылы толгъунчу ичги ичсе, ол законнга бузукълукъ этгеннге саналып, жууапха тартылгъанды. Король Уллу Карлны буйругъуна кёре, эсиртиучю затны аузуна тийирген адамны сыртына 100 чыбыкъ ургъандыла. Алгъа юйню ичинде, артда уа жамауатны аллында.

Россейде ичгини юсюнден айтхан заманда, ары-бери ауа баргъан эсирген адам кёз аллынга келеди. Кертиси, бизни къыралда дуния-къууанч да аракъысыз болмайды. Бу жарашыусуз аман адет башха регионлагъа да бек жайылгъанды.