КъМКъУ-да кёп профильли школ ачыллыкъды

Быйыл 17 июльдан башлап айны ахырына дери  Къабарты-Малкъар къырал университетде 6-10 класслада окъугъанлагъа   кёп профильли  школ ишлерикди. Аны магъанасы жаш адамланы физикадан бла  математикадан даражалы  эришиулеге хазырларгъады эм бу илмулагъа эслерин  бурургъады.

Дерслени Москваны физикадан жыйымдыкъ командасыны тренер штабыны келечилери эм МГУ-ну, МФТИ-ну, ВШЭ-ны тюрлю-тюрлю олимпиалада  хорлагъан  студентлери бардырлыкъдыла. 

Программагъа кёре,  алтынчы класслада окъугъанлагъа  физика, математика, физика практикум, комбинаторика, геометрия эм алгебра  курсла боллукъдула.     Жетинчи классны келечилери да  физика практикумну, математиканы, планиметрияны эм алгебраны окъурукъдула.  8-9 эм 10-чу классланы келечилери уа планиметрияны, программированияны мурдорун  эм компьютерледен практиканы ётерикдиле. 

Кюн сайын алты дерс бардырыллыкъды. Ахырында устаз окъуучуланы сорууларына жууап  берликди. Окъуу къауумла тестлени эсеплерине кёре къураллыкъдыла.  Аланы иги  эсепле бла бергенле  олимпиадалагъа  хазырланырыкъдыла.     

Дерсле КъМКъУ-ну баш корпусунда 9:00 сагъатда башланадыла.