Окъучуула хунерлерин сынайдыла

Онунчу-онбиринчи классланы окъуучуларына деп къуралгъан «Жаш тёлю эмда жамауат» деген социал илмуладан ачыкъ олимпиада Къабарты-Малкъар къырал университетде озгъанды. Ол окъуу юйню вузгъа дери эмда усталыкъ бла шагъырейлендириу иш жаны бла управлениясыны бла социал ишни теориясы эмда технологиясы кафедрасыны башламчылыкълары бла къуралгъанды.

Анга бу жол эки жюзден аслам жаш бла къыз къатышхандыла. Сынаула школчуланы чыгъармачылыкъ жаны бла хунерлерини айныу даражаларын эмда аланы илму итнтиулеге сейирлерин баямлау мурат бла бардырыладыла. Андан сора да, фахмулу жаш тёлюге тутхучлулукъ этиу, илмугъа кёллендириу, социал ишде документацияны не халда бардырылгъаны бла да байламлыды.

Социал илмуладан олимпиаданы кезиуюнде анда билимлерин сынагъанла эки сагъатны ичинде обществознаниядан, тарыхдан, философиядан, социологиядан эмда орус литературадан бир къауум соруугъа жууапла жазаргъа керек болгъандыла.

Дагъыда университетде бу кюнледе туризмден бла краеведениядан ачыкъ сынау озгъанды. Ол а «Туризмни энциклопедиясы» деген ат бла бардырылгъанды. Анга да республиканы мектеплерини онунчу-онбиринчи классларына жюрюгенле къатышхандыла. Олимпиада Устазны бла насийхатчыны жылына аталып къуралгъанды.

Сынаугъа келгенлени алларында сёлеше, КъМКъУ-ну социал-гуманитар институтуну туризмде экономика эмда менеджмент кафедрасыны башчысыны къуллугъун толтургъан, экономика илмуланы кандидаты Байсолтанланы Лейла жаш адамла вузда «Туризм» эмда «Къонакъ юй бла байламлы иш» деген ызлагъа кёре бийик билим алыргъа боллукъларын айтханды эмда олимпиада алагъа къаллай онгланы берлигин да ангылатханды.

Ызы бла окъуучуланы сынаулагъа хазырлагъан устазлагъа, ата-аналарына да сабийлеге ышаннганлары эмда аланы кёллендиргенлери ючюн хурмет этгенин билдиргенди. Жаш тёлюге жетишимле да тилегенди.

Олимпиаданы темасы уа онтогъузунчу-жыйырманчы ёмюрледе Къабарты-Малкъарны миллет жарыкъландырыучулары бла байламлы болгъанды. Сёз ючюн, Шора Ногмовдан, Хан-Гирейден, Измаил-бейден бирин эсге тюшюрюп, аны социал-политика кёз къарамыны юсюнден айтыргъа керек эди.

Андан сора да, Малкъарны биринчи тарыхчысы деп кимге айтылгъанын, аманат школда кимле окъугъанларын, тарых къыйматлы китапланы, материалланы жазгъан авторланы билирге да. Чыгъармачылыкъ бла байламлы иш - ол «Шимал Кавказны Россейни маданиятына къошулууунда жарыкъландырыучуланы къошумчулукълары» деген темагъа эссе жазыу болгъанды. Сынауланы соруулары, бирси ишлери да «КъМР-ни географиясы», «КъМР-ни тарыхы», «КъМР-ни халкъларыны маданиятлары эмда адет-терелери» деген мектепледе окъутулгъан программалагъа, курслагъа тийишлиликде жарашдырылгъандыла.

Сагъынылгъан олимпиадаланы эсеплери артдаракъда белгили боллукъдула эмда алада хорлагъанлагъа, призёрлагъа бла лауреатлагъа тийишлиле уа дипломла, саугъала бла майда белгиленирикдиле. Бу кюнледе уа энди университетни баш корпусунда онунчу-онбиринчи классланы окъуучуларына «Медицинагъа атлам» деген ат бла ачыкъ олимпиада озарыкъды.

Эсигизге салайыкъ, къайсы предметден хорлагъанына тийишлиликде, сынаулада алчылыкъны болдургъан адам университетге окъуугъа кире туруп, аны Бир къырал экзаменден эсебине беш балл къошуллукъду. Призёр даражагъа чыкъгъанлагъа уа ючюшер балла берилликди.

Трамланы Зухура.
Поделиться: