Тамашалыкъ жерлерибиз бла шагъырейленнгендиле

Къабарты-Малкъарны туризм жаны бла онглары «MITT 2023» кёрмючде кёргюзтюлгендиле. Бир майданда 600 эксперт, туроператор, транспорт компанияланы, ишчи туризмни келечилери, автор турланы къурагъанланы бла бизнесни башчылары жыйылгъандыла.

Кёрмючню чегинде «MITT-де жолоучуну кюню. Россейни бла дунияны бирге ачабыз» деген жангы проект бардырылгъанды. Анда бизни республика проектге къатышыргъа эркинлик берилген 12 регионну санына киргенди. «Къабарты-Малкъар жюреклени бийлейди» деген чакъырыу бла профессионал гид Дарья Фролова субъектни къонакъбайлыгъыны, мында туристлеге къаллай онгла къуралгъанларыны юсюнден билдиргенди. 

Кёрмючню ишчи программасында уа «Кавказ.РФ» общество «Шимал Кавказны тау курортлары. Жылны битеу кезиулеринде онглары» деген тематика сессия къурагъанды. Анда «Эльбрус» эм «Ведучи» турист продуктланы, алада адамла аслам къатышхан мероприятияланы бардырыуну юсюнден айттылгъанды. Туризм эм къонакъбайлыкъ жаны бла усталыкъ билим бериу системаны халын тинтгендиле, конференцияла, презентацияла, ушакъла бла юйретиу семинарла къуралгъандыла.

Субъект жыл сайын MITТ-ни кёрмючлерине дайым къатышады. Быйыл аны стендинде Къабарты-Малкъарны туризм бла кюрешген онеки  предприятиясы кёргюзтюлгенди: Элбрус бийик тау лыжа курорт, «Гедуко», «Бахсан солуу ара» саулукъ кючлеу комплексле, «Гранд-Кавказ» къонакъ юй, внедорожникледе экспедицияланы къурагъан «Глобал Кавказ» бла «Облепиха», «Пеликан-тур», «По Кавказу», «Сантрек тур», «Кавказскитур», «Элькада», «Эльбрус турс» турист операторла.

Республиканы Курортла эм туризм министерствосуну жамауат эм асламлы органла бла байламлыкъ жюрютюу жаны бла бёлюмюню таматасы Ольга Погребняк билдиргенича, арт жыллада кёрмючлеге кёз къарам толусунлай тюрленнгенди. «Бизнес алагъа къатышыуну магъанасын ангылагъанды. Ол турист продуктну юсюнден кёп адамгъа билдириу, жангы билим алыу жаны бла да хайырлыды», – дегенди ол.

MITT дунияны эм уллу профильли кёрмючлерини санындады, быйыл анга 57 россейли регион къатышхандыла. Кеслеринде туристлени солууларын къалай къураяллыкълары бла СНГ-ны бла тыш 24 къырал шагъырейлендиргендиле.