Фашизм башын кётюрмез ючюн

Нальчикде «Махтаулукъну ёмюрлюк оту» мемориалда СССР фашист Германияны хорлагъанлы 78 жыл толгъанына аталып, уллу патриот акция болгъанды. Анда жамауат организацияланы, министерстволаны эм политика партияланы келечилери, жаш тёлю фашизмге къажау «Бизни деменгили Ата журтубуз» союз патриот проектни чегинде марш-эстафетагъа къатышханлагъа къууанчлы халда тюбегендиле.

Аланы Урушну, урунууну, сауутланнган кючлени эм право низамны саукълаучу органланы ветеранларыны Нальчик шахарда советлерини башчысы Абдуллаланы Мустафа алгъышлагъанды.

- Биз бюгюн аскер махтаулукъну шахары Нальчикде ёмюрлюк отну къатында бек багъалы къонакълагъа тюбейбиз. Быйыл тарых бла байламлы кёп магъаналы кюнню белгилерикбиз – республиканы фашистледен азатлауну, аланы Сталинградда бла Курскда ууатыуну. Бу ишлени юсюнден а, бек алгъа, жаш тёлю билирге тийишлиди. Сизни ата-бабаларыгъыз дунияны кесине къул этерге излеген душманны къурутхандыла, жер башына мамырлыкъ, ырахатлыкъ келтиргендиле. Аны ючюн а бир атламны артха бармай, жанларын-къанларын аямай уруш этгендиле. Бизни бюгюн борчубуз, алагъа хурмет эте, эсибизде сакъларгъады.

Эм огъурсуз урушда биз 26 миллион адамыбызны тас этгенбиз, совет аскерчилерибиз Баренцово тенгизден башлап Ледовитый океаннга дери къазауатлагъа къатышхандыла. Уллу къырал бюгюлмегенди, баш урмагъанды. Бюгюн да аллыбызгъа жангы къоркъуу чыкъгъанда, фашизм жангыдан башын кётюрюрге излегенде – анга тийишлисича жууап берирге борчлубуз. Аланы умутлары толлукъ тюйюлдю, Россей шуёхлукъну сюйген къыралды, бу жол да хорлам анда боллукъду, - дегенди Мустафа Камалович.

Ызы бла сёз акцияны къурагъанладан бири Олег Слюсаренкогъа берилгенди. «Хар уллу къыралны тарыхында аны тин, билим эм кёп башха жаны бла онжыллыкълада айныуун белгилеген ишле боладыла. Бизни кёп миллетли къыралыбызда ол жерни Уллу Ата журт уруш алгъанды. Совет аскерле фашистлени ууатханлары аланы бирликлерини белгисиди. Уллу къыйын салып, ата-бабаларыбыз гитлерчилени тыйгъандыла. Бусагъатда да бандеровчуланы къурутургъа керекди. Бизни фашизмге къажау проектибизни мураты да айтхылыкъ тарыхыбызны ёмюрледе сакълауду, бусагъатдагъы болумлада жамауатыбызны бирикдириудю эм журтубузну жерлерин къоруулауду», - деп, Олег Слюсаренко республиканы башчыларына, жыйылгъанлагъа да ыразылыгъын билдиргенди.

Парламентни депутаты Коммунист партияны регионда бёлюмюню биринчи секретары Борис Паштов да бюгюнлюкде уллу къыралны халкъларыны жигитликлери къаллай магъананы тутханын чертгенди. Ол, жаш адамлагъа айланып, жашауларын башлагъан, сайлау этген, игини осалдан айыргъан кезиуде, тюз оноу этерге кереклисин айтханды. «Фашизмни къурутур ючюн къаллай багъа берилгенин, аны багъасы уа адамланы жашаулары болгъанды, унутулмазгъа тийишли эди. Битеу дуния ол дерсни ангылап, мындан арысында фашизмни ызы да къалмазча этерге кюреширге керек эди. Алай бусагъатдагъы болум бир-бирле ол эсеплени унутханларын кёргюзтеди, фашизм жангыдан жаратылып башлагъанчады. Аны ниети уа недеди – бир тюрлю шартлагъа келишмеген адамланы учуз этиуде, аланы намысларын тюшюрюуде, къурутууда. Аны ючюн бардырылады бу акция, аны ючюн таматала сизге насийхат этедиле», - деп белгилегенди Борис Султанович. Ол, Малкъар халкъны да жангырыу кюню бла алгъышлап, жер башында бир халкъ да аллай къыйынлыкъ чекмезин тежегенди.

Уллу Ата журт урушда ёлгенлени бир минутну шош туруп эсгергенлеринден сора жыйылгъанла Жаш къараучуну театрыны аллында Хорламны байрагъын жайгъандыла.

«Бизни деменгили Ата журтубуз» союз патриот проектни чегинде марш-эстафетаны чегинде анга къатышханла быйыл жолоучулукъларын Запорожье областьда Мелитополь шахарда башлап, Херсон областьда, Кърымда, Севастопольда, Краснодар эм Ставрополь крайланы шахарларында, Абхазияда болгъандыла, Нальчикге жетгендиле. Мындан эстафета Пятигорскга ётерикди, андан а Цхинвалгъа, алай бла ала битеу да 110 шахаргъа къайтырыкъдыла. Къыбыла жанында – Дербентге, кюнчыгъышда – Нижний Новгородда, шималда – Полярныйде бла Мурманскда эм кюнбатышда Брестде боллукъдула. Аланы барысында да Хорламны 200 квадратметрлик байрагъын жаярыкъдыла. 9 майда уа «Ёлюмсюз полкну» санында аны Москвада Къызыл майданнга чыгъарлыкъдыла.