Огъурлулукъдан жаратылгъан суратла

Суратлау искусстволаны А.Л. Ткаченко атлы музейинде сейирлик кёрмюч ачылгъанды: анга малкъарлы архитектор, назмучу, тилманч эм суратчы  Сарбашланы Азнорну эм Калмыкияны халкъ суратчысы Виктор Дорджиевни чыгъармалары киргендиле. Бояу суратла, графика, акварельле – хар жанр да кёргюзтюлгенди мында. Эки жюзден артыкъ иш – алагъа къаллай бир къыйын киргенди. «Жангырыу» деген юбилей проект Малкъар халкъны жангыртыууна жораланнган жумушланы чегинде къуралгъанды.

 КъМР-ни  маданият министрини орунбасары Къарчаланы Аминат  кёрмючню ача, ол халкъланы бирикдиргенин, аланы къадарларында уа кёп бир кибик затла болгъанын кёргюзтгенин чертгенди. Хау, таулула да, къалмукъла да Ата жутрларын тас этип, артда, кёп къыйынлыкъла кёргенден сора, жангыдан тапхандыла. Баям, аны ючюн биз былай къаты сюе болурбуз туугъан жерибизни.  РФ-ни халкъ суратчысы Герман Паштов суратчыгъа багъаны халкъ кеси береди, дегенди. Азнорну ишлерин а адамла бек сакълайдыла, хар жангы чыгъармасын социальный сетьледе сюзедиле.

Жарсыугъа, Виктор Дорджиев саулугъу бла байламлы чырмаула ючюн кёрмючню ачылыууна келалмагъанды. Ол кеси да таулу суратчы бла кёп жылланы шуёхлукъ жюрютеди. 

КъМР- ни Суратчыларыны биригиуюню башчысы  Жанна Канукова, РФ-ни халкъ устасы Мокъаланы Владимир, запасдагъы офицерлени «Мегапир» биригиуюню бизни республикада бёлюмюню таматасы полковник Аталаны Жашарбек, «Къайсыннга жюз атлам» тарых-маданият фондну таматасы Тетууланы Хадис эм башхалада  кёрмючню байлыгъын белгилегендиле эм эки художникге да чыгъармачылыкъларында жангы жетишимле тежегендиле. 

Сарбашланы Азнор не жаны бла да фахмулу адамды. Аны башхаланы чыгъармаларына кёз къарамы да бек сейирди: не заманда да ариу сёзюн къызгъанмайды. Тили жумушакъды, ишге жетгенде уа, тоя билмейди. Азнор энтта да жангы усталыкълагъа юйренсе да, бир инсан да сейир этерик тюйюлдю. Таулу халкъгъа уа Сарбаш улу бек багъалыды: ол бизни жерибизни ариулугъун битеу дуниягъа кёргюзтеди. 

Акъ сёз жаны бла да ол кёп битеуроссей эм халкъла аралы эришиулеге къатышып, алчы жерлени алады. Эрттегили дунияда бусагъатдача тар специализация болмагъанды, сурат ишлегенле назму да жазгъандыла, скультурала да этгендиле, медицинадан ангылаулары да болгъанды. Анга тарыхда кёп шагъатлыкъла бардыла. Сарбашланы Азнор буруннгу адамлача жашайды, толу билимге итинеди десек, ётюрюк айтырыкъ тюйюлбюз. Къараучула, окъуучула аны жюрегин, итиниулерин сезедиле, ангылайдыла эм кеслерини жанларындан жюрек ыразылыкъларын, сюймекликлерин саугъалайдыла.

Ахырында Сарбаш улу жыйылгъанлагъа кёрмючге келгенлери ючюн жюрек ыразылыгъын билдирип, туугъан журтуну игилигине деп къадалып ишлеригин кёлю кётюрюлюп айтханды.
Экспозицияда, белгилегенибизча, 200-ден артыкъ чыгъарма кёргюзтюледи. Ол кеси да тогъузунчу апрельге дери боллукъду.