Табийгъат жолла жангыртыллыкъдыла

 «Кавказ.РФ» обществону пресс-службасындан билдиргенлерине кёре, Минги тауда алты экомаршрут бу жайда айбатландырыллыкъдыла. Ала Шимал Кавказда эм ариу боллукъдула, къонакълагъа бла туристлеге, спортну сюйгенлеге да сейир кёрюнюрюкдюле.

Обществону генеральный директору Рустам Тапаев айтханнга кёре, бюгюнлюкде экология туризмге эм тири солуугъа аслам эс бёлюнеди. «Биз да, ол къымылдауну къабыл кёрюп, курортубузда таулада жолоучулукълагъа чыкъгъанлагъа тынчлыкълы, зауукълу эм къоркъуусуз болумла къурар умутлубуз. Болгъан жолчукъланы тапландырыу эм жангыларын ишлеу июньда башланырыкъды. Алада навигация системала, буруула, билдириулери бла къангала салынырыкъдыла, солугъан жерле тапландырыллыкъдыла. Ол а, сёзсюз, экомаршрутлагъа сейирни ёсдюре, жайда бери келгенлени санын кёбейтирикди», - дегенди ол.

Жангыртыу ишле бардырыллыкъ экомаршрутланы узунлукълары 30 километрди. Аладан бири – «Таугъа ёрлеу» - Элбрусха къыбыла жанындан чыкъгъанланы жолуду, аны бла жангызда къауумну ичинде гид бла бирге барыргъа жарайды. Гитче Азау чыранны тюбюнде Элбрус кёлге, Бахсан ауузунда «Девичьи косы» чучхургъа, Семерка чыранны къатында Донгузорун кёлге, агъач ичи эм Бахсан сууну жагъасы бла баргъан Азау – Чегет – Нарзанла таласы – Тегенекли экомаршрутла – ала барысы да быйыл айбатландырыллыкъдыла. Бусагъатда алада толтуруллукъ ишлени проекти жарашдырыла турады, деп билдиредиле республиканы Курортла эм туризм министерствосундан.