Биринчилени атламлары

«Бизни мектебибиз айтхылыкъ алим Энейланы Тимурну атын жюрютеди, биз а аны атына кир къондурур амалыбыз жокъду!» - деген сёзле бла  тюбегенди Кёнделен элде  4-чю номерли мектепни директору  Атмурзаланы Мухтар.

Биз ары баргъан кюн анда кёрген затларыбызны эсге ала, мектепчиле керти да  аны атына  кертичи болгъанларына шагъатбыз. Мектепде  Россейни сабийлерини эмда жаш тёлюсюню «Биринчилени атламлары» деген  биригиуюню бёлюмю ачыла эди.  Аны къууанчына  КъМР-де  регион биригиуню председатели Аслан Шипшев, советни къауумуна кирген бир къауум адам да баргъандыла.

Сабийле, мектепде тюрлю-тюрлю кёрмючле къурагъанларындан сора да,  эсде къалырча сейирлик концерт программаны кёргюзтгендиле. Анга уа эки жыллыкъладан башлап  къызчыкъла бла жашчыкъла къатышхандыла. Мектеплерин,  « Фотограмметрия эмда 3 D  моделирование», «Жомакълы  Джин» мастер-классланы кёргюзтгендиле.  Аланы устазла эмда мектепде окъугъанла кеслери  къурагъандыла,  дагъыда  окъуучула кеслери ишлеген  затладан кёрмючге къараргъа чакъыргъандыла.

- Бир-бир шахар мектепледе да жокъду быллай аламат  къуралгъан билим бериу амалла. Мен бек къууандым бери келгениме эмда мында  сиз кёргюзтген затлагъа. Мындан ары да  къаллай ишигизде да жетишимли болуругъузгъа ийнанама,-дегенди Аслан Шипшев.  Тёреде болуучусуча, бу мектепни окъуучуларына да ала жамауат организацияны тизгинлерине киргенлерине шагъатлыкъ этген энчи къагъытны бергенди.

Бёлюмге къошулуу бла байламлы къууанчлы иш «Бир бири бла тенгликде сёлешиуде»  бошалгъанды. Аны кезиуюнде  мектепчилени  кёп предложениялары эсге алыннганды.