КъМКъУ-ну келечилери Сколковода тёрт тюрлю проект кёргюзтюрюкдюле

Кёп болмай Сколковону илму-техника институтунда быйыл бла экинчи кере бардырылгъан «Остров 10-22» деген билим бериу  интенсив башланнганды. Анда регионланы  университетлеринден жюз эм  Россейни бла тыш къыралланы 1600-ге жууукъ илму-жарыкъландырыру араларыны келечилери ишлерикдиле.  

Форумгъа келгенлени алгъышлай,  «Жаш устала»  эмда  «Стратегиялы башламчылыкъланы агентствосуну»   таматасы,  РФ-ни Президентини цифралы  эм технологияланы  айнытыу  энчи келечиси Дмитрий Песков, илму эм бийик билим бериу жаны бла министрни биринчи орунбасары Григорий Трубников, «Университет 2035» деген  коммерциялы болмагъан организацияны  таматасы Василий Третьяков, илму-билим бериу араланы эм бизнес-структураланы  таматалары  да сёлешгендиле. 

- Интенсивде  сизни «тамблагъы» кюнню юсюнден  сагъыш этерге, магъана  бермеген жерде амал   табаргъа юйретирикбиз.   Аны ючюн  команда бла тири ишлей билирге керек боллукъду, - дегенди Дмитрий Песков. 

Бизни республикадан анга КъМКъУ-ну билим бериу жаны бла проректору Вадим Лесев, университетде миллет  технологияла башламчылыкъла жаны бла проектлени бардыргъан департаментни  таматасы Махийланы Танзиля,  бюджет эм планирование жаны бла управленияны таматасы Евгений Синцов, жаш тёлю политика эм юйретиу жаны бла управленияны таматасы Астемир Кясов,  студент советни таматасы Мирланд Казанчев къатышхандыла.  Ала  проектле  къураргъа, цофралы экономиканы кезиуюнде сервислени хайырланыргъа юйреннгендиле,   лекциялада, мастер-класслада эм  тренингледе да болгъандыла. 

22 июльда   форумну экинчи кесеги боллукъду. Ол кюн  командала,  кеслерини  проектлерин ачыкълап, аланы бардырырча нёгерле  бла  спонсорла излерикдиле.  Эсге сала айтсакъ,   жерлешлерибиз  анда саулукъ сакълаудан  бла  башха   илму сфераладан тёрт проект кёргюзтюрюкдюле.   

Магометланы Сулейман.
Поделиться: