Мекямны ишлетиуге кеслерини ахчаларын къошханланы эркинликлери сакъланырыкъды

РФ-ни Къырал Думасы экинчи окъулуула къабыл кёрген документле кёп къатлы юйледе фатарла ишлетиуге кеслерини ахчаларын къошхан инсанланы (долевой къурулуш) эркинликлерин сакълаугъа бурулупдула.  Законопроектледе бу амал бла ишлетилген мекямла битдирилмей къалсала, андан ары мадарла белгиленипдиле. Ала «Единая Россияны» фракциясыны депутатларыны башламчылыкълары бла жарашдырылгъанды, деп билдиргендиле бизге партияны пресс-службасындан.  

Думаны депутаты, «Единая Россияны» Генеральный советини президиумуну келечиси Александр Якубовскийни айтханына кёре,  алай бла эрттеден жыйылгъан кемчиликлени тамамларгъа онг боллукъду. «Биринчи законнга  кёре, инсанла къурулушха кеслерини юлюшлерин къошуп, алай билдирилмей къалгъан объектлени тизмеси къураллыкъды. Шартла жашау журт ишлетиу жаны бла бирикдирилген информация системада басмаланырыкъдыла»,-дегенди ол.

Андан сора да быллай къурулушда аналыкъ капиталны хайырланыуда келишмеулюкле да кетерилликдиле. «Энди сертификатны банклада ачылгъан энчи счётда сакъларгъа эркинлик берилгенди»,-деп къошханды ол.

Къурулушчула алдатхан инсанлагъа къоранчларыны бир кесегин артха къайтарыуну низамы да тохташдырыллыкъды. Алгъын  бу тёлеулени мекямны ишлетиуню юсюнден келишим этилген кезиуде багъалагъа кёре тергелгендиле. «Алай бла уа адамла  къоранчларын къайтаралмагъандыла. Энди уа компенсация фатарны рынок багъасына кёре саналлыкъды»,-деп къошханды парламентарий.

Законопроектле регионлагъа долевой къурулушха къатышхан инсанланы эркинликлерин сакълау жаны бла фондланы себепликлери бла хайырланыргъа  онг бередиле. Фондла дагъыда къурулуш бардыргъан компанияла банкдан ахча алгъан кезиуде болушлукъ эталлыкъдыла. 

Тикаланы Фатима хазырлагъанды.
Поделиться: