Памперслени хаталары бармыды?

Бусагъатда сабийлени памперсле бла ёсдюредиле. Ол игимиди огъесе аманмыды? Аны юсюнден биз Новоивановка элни педиатры Магрелланы Келимат бла ушакъ бардыргъанбыз.

-«Парниковый эффект»  дегенлери тюзмюдю? Жашчыкъла памперсле ючюн къаратон болургъа боллукъмудула?

-Бир кере хайырланылыучу подгузниклени жашчыкъланы саулукъларына заран келтиргенлерини юслеринден газет материалланы барысында да «парниковый эффект» деген зат эсгерилмей къалмайды. Авторланы айтханларына кёре, памперсни ичинде температура уллу болгъандан сора да мылылыкъ да болады. Ма ол экиси бирге болсала тюшеди заран сабийни саулугъуна.Алай  памперслени хайырланыуну баш магъанасы мылылыкъны кетериудю. Памперсни ичинде болгъан абсорбент мылыны къоймай жутханыны хайырындан сабийни тёбен жаны къургъакълай турады.

Парниковый эффектни юсюнден:памперсни сабийни этине не бек жабышдырып тохташдырыргъа кюрешсегиз да, хауаны  тыяллыкъ тюйюлсюз.Мылылыкъ болмаса, хауа да тыйгъычсыз айланып турса, «парниковый
эффект» къалай бла боллукъду да? Сиз памперсни суткала бла алышындырмай, багъалы жабыуугъузну кир этмесин деп подгузникни юч-тёрт къаты плёнка бла тышласагъыз, ол халда эшикде айланыргъа деп атлансагъыз, «парниковый эффект» болургъа да болур. Къысхасы, жашчыкъланы ёсдюрюуде памперслени хайырланыргъа  жарайды.

Болсада, бир–бир алимле памперследен заран тюшеди дейдиле.Сёз ючюн, немисли педиатрла (Киль шахарны университети) 48 сабийге къарагъандан сора аланы бюртюкчюклерини температураларын къалай тинтгенлерини юсюнден оюмларын басмалагъандыла. Анда айтылгъанына кёре, памперслени хайырланыу аланы эр киши урлукъларыны качестволарына заран келтирирге боллукъду.Илмуда «болургъа боллукъду» неда «болмазгъа боллукъду» деп багъа бичиу бир затны тутмагъанын ангылагъан къыйын тюйюлдю. Газетлеге уа
адамланы къоркъутургъа ол оюм окъуна жетерикди. 

 Кертиси бла да, сейир билдириу тюйюлмюдю да - памперслени хаталырындан кёпден-кёп болуп барадыла къаратон кишиле десек! Кертиси бла да, дунияда аланы саны ёсюп барады. Алай аны сылтаулары кёпдюле: къымылдаусузлукъ эм асламысында жашауну олтургъанлай ётдюрюу; ичги, тютюн, наркотикле;жашауда хайырланылгъан химияны кёплюгю; мардадан кёп ашау; гитчеликден башлап, керек болса, болмаса да, дарманланы тохтаусуз ичиу, ашау;къаратонлукъгъа келтирлик ауруула-венерический (ит) ауруула, эпидемиялы паратит (свинка); юйде да, ишде да психиканы къозгъагъан затла;экология болум.  

-Къызчыкъла бла уа хал къалайды?

-Къызчыкъла бла памперсле  деген темада сакъ болугъуз дерча зат барды.
Эсигизде тутугъуз: подгузникни заманында алышындырмасагъыз, неда
сабийни тюбюн жуууну техникасына бузукълукъ этсегиз, чеги бактерияла аны уятлыгъына къутулургъа боллукъдула, алай бла сабий аурур деген къоркъуу болады. 

Памперсле бла хайырланмай шёндю жашаргъа къыйынды. Сабий поликлиникагъа окъуна барама десенг, иги кесек заман озады. Неда тойгъа къатышсанг, неда башха элде жашагъан жууукъланы жокълайма десенг  - бек керек боладыла. Алай ала бла хайырланнганлыкъгъа тазалыкъны унутургъа жарамайды. Сау сутканы бир памперсде тургъан сабий саусуз боллукъду. Юйде да къуру  ала бла турургъа керекмейди. Къонакъгъа, поликлиникагъа, тюкеннге, театргъа баргъанда, элде жарамайды.