Гулийланы Тамирлан – спартакиаданы призёру

Россейни окъуучуларыны Белгородда бардырылгъан тогъузунчу жай спартакиадаларында ауур атлетикадан финалгъа къыралны 13 регионундан сегизини эм кючлю штангачылары чыкъгъандыла. Бу эришиулени энчилиги неди десегиз, аланы эсеплерине кёре 15-17-жыллыкъладан къуралгъан командала  Европаны биринчилигине хазырланырыкъдыла.

Спортчула он ауур къауумгъа юлешинип алай демлешгендиле. Аладан биринде – 55 килограммгъа дери ауурлукъда – Элбрус районда олимпиадалы резервли спорт школгъа жюрюп тургъан, бюгюнлюкде уа Москваны командасына кирген Гулийланы Тамирлан кючюн сынагъанды.  Ол штанганы алты кере да жетишимли кётюргенди, ахырында эки упражненияда 195 килограммны алып (сермеп – 87, тюртюп – 108 кг), ючюнчю жерге чыкъгъанды эмда доммакъ майдал бла саугъаланнганды. Экинчи призёр андан жаланда бир килограммгъа кёп кётюргенди.

Аны насийхатчысы Муаед Шаов айтханнга кёре, Тамирлан бла эришгенле андан эки жылгъа тамата болгъандыла. Анга да къарамай, жаш аланы сагъайтдыргъанды. Андан да кёпню кётюраллыкъ эди, алай битеу командалы эсепге алчы жерледен бирин алса да тамам эди да, Москваны тренерлери андан ары къадарны сынамазгъа оноулашхандыла. 

Белгородда Гулий улу кесини алгъыннгы эсеплерин тогъуз килограммгъа игилендиргенди. Анга 15 жыл болады, бу аны быллай даражалы эришиуледе экинчи сыйлы саугъасыды. Алгъын ол 17-жыллыкъланы араларында  бардырылгъан Россейни биринчилигинде «кюмюш» алгъанды.  Бюгюнлюкде Тамирлан кесини жыл санындагъыланы араларында къыралда бек кючлю атлетге саналады, энди  быйыл декабрьде Израильде бардырыллыкъ Европалы биринчиликге хазырланырыкъды.

Анатолий Темиров.
Поделиться: