Хакъсыз медицина болушлукъну, багъыу учрежденияланы ырысхы-техника онгларын эмда аланы дарманла бла жалчытыуну игилендириуню мадарлары сюзюлгендиле

Грозныйде Александр Матовниковну башчылыгъында РФ-ни Президентини СКФО-да толу эркинликли келечисиндеги Советни жыйылыуу  болгъанды. Анга КъМР-ни Башчысыны къуллугъун болжаллы халда толтургъан Казбек Коков къатышханды.
     Кенгешде  хакъсыз медицина болушлукъну,  багъыу учрежденияланы ырысхы-техника онгларын эмда  аланы дарманла бла жалчытыуну игилендириуню мадарлары сюзюлгендиле. Кесини ал сёзюнде Александр Матовников халкъны медицина жумушла бла тынгылы жалчытыу бек магъаналы ишледен бири болгъанын чертгенди. Бу жыйылыуну повесткасына да ол  бошдан кийирилмегенди. «Саулукъ сакълауну айнытыу, адамларыбызны  жашау болумларын, кюч-къарыуларын игилендириу регионну оноучуларыны баш борчларындан бирине саналады. Бизни барыбызны да муратыбыз бирди -  ол жумушщну тынгылы тамамлау, ачыкъланнган кемчиликлени не къадар аз этиу»,-дегенди полпред.
    Ызы бла РФ-ни саулукъ сакълау министрини биринчи орунбасары Татьяна Яковлева сёлешгенди. Ол «Саулукъ сакълау» миллет проект къалау толтурулгъанын, анга кёре къырал демография жаны бла къаллай кёрюмдюлеге жетгенини эмда аны энтта да не онглары болгъанларыны юсюнден билдиргенди. СКФО-ну битеу субъектлеринде да адамланы жашау ёмюрлери саулай Россей Федерациядан эсе уллу болгъанларын, арт жыллада регионда къагъанакъланы бла ишлерге жараулу адамланы араларында ёлгенле да азайгъанларын  айырып айтханды.   Хал былай барса, инсанланы жашау ёмюрлерин РФ-ни Президентини  «Россей Федерацияны 2024 жылгъа дери айнытыуну миллет эмда стратегия борчларыны юсюнден» 2018 жылда 7 майда чыгъарылгъан 204-чю номерли Указында кёргюзтюлген ёлчемлеге жетерге къолдан келликди,дегенди.
   -Къырал №Саулукъ сакълау» миллет проектге иги кесек ахча -1,3 триллион сом – бёлюрге мурат этеди. Ол игиди, алай медицина болушлукъну къыйматлы амалларын сингдириуню магъанасы андан кем тюйюлдю,-дегенди Татьяна Яковлева.
     Жыйылыуда сёлеше, Казбек Коков республикада Онкология диспансерни болуму бек осал болгъанын билдиргенди. Ол 1931 жылда ишленнген мекямда орналыпды. Перинатал араны бёлюмлери башха жерге кёчгенликге да, мекям азлыкъ этерикди. Аны юсюнден Россейни Саулукъ сакълау министерствосу бла сёлешиннгенди, халны тюзетиуню онгларына къараргъа деп оноу этилгенди.