«Библиотекала жангызда китапла жыйышдырылгъан жерле тюйюлдюле»

Элбрус районну Ара библиотека системасына Тырныауузда бла элледе орналгъан 14 библиотека бла аланы бёлюмлери киреди. Аладан эм эрттегилиле 1938 жылдан бери ишлеген ючюнчю бёлюм, сабий эм ара библиотекала, Быллымда, Кёнделенде бла Огъары Бахсанда китапханаладыла. Бюгюнлюкде ала барысы да, салыннган борчланы тамамлай, ишлерин тынгылы бардырадыла.

Ара библиотека системаны директору Тебердиланы Лейла белгилегенича, бусагъатдагъы жашауда библиотекала жангызда китапла жыйышдырылгъан жерле тюйюлдюле. Алада кёп тюрлю информацияны табаргъа, билимни ёсдюрюрге, эркин заманны хайырлы ётдюрюрге боллукъду. Мында тюрлю-тюрлю мероприятияла да дайым къураладыла. Арт жыллада компьютерле, башха техника бла оборудование алыннганы бла китапхаланы ишлери жангы даражагъа кётюрюлгенди.

Бюгюнлюкде библиотекала информация, жарыкъландырыу эм маданият араладыла, алада ишлегенле тюрлю-тюрлю жыл санда окъуучула сейирлерине кёре китапла табарларына, алагъа тынчлыкъла болум къураугъа къайгъырадыла. Къыралыбызда «Маданият» миллет проектни чегинде модель китапханала ачыладыла. Былтыр, жангыртыу ишледен сора, Тырныауузда Отарланы С.А. атын жюрютген ара библиотека ишлеп башлагъанды. Анда эм жангы техника орнатылгъанды, окъуу залына бла абонемент бёлюмюне ремонт этилгенди, сабий эм жаш тёлю бёлюмле ачылгъандыла, электрон китапла, жангы адабият бардыла. Алай бла ол ырахатлы, адамланы кёллерин кётюрген, кёзлерин къууандыргъан майдан болгъанды.

Интернет айныгъаны бла китапла сейир азыракъ болгъанчады. Алай, Тебердиланы Лейла айтханыча, алагъа келгенлени асламысы окъуучула бла студентледиле, ала мында аттестациягъа, рефератланы, чыгъармачылыкъ ишлени жазгъанда керекли литератураны табаладыла. Тёгерекде дунияны юсюнден билимлерин ёсдюрюрге сюйюп неда китап окъуу хычыуун кёрюнюп келгенле да асламдыла. Окъуучуланы хар бир къауумуну излемлерине келиширча китап фонд дайым толтурулады. Алай бла арт кезиуде 2453 издание алыннганды, бюгюнлюкде районну китапханаларында 161 550 китап барды. Окъуучуларын сакъларча эм аланы санына къошарча библиотекала заманны излемлерине кёре айныгъан да этедиле, жамауат жашауну арасы боладыла, клуб иш да барады.  Тарых датала, белгили адамланы туугъан кюнлери белгиленедиле. 

Районну библиотекаларында краеведение, экология жарыкъландырыу, тарых-патриот, граждан-право, тин-ниет эм эстетика юйретиу, саулукълу жашау бардырыргъа кёллендириу, осал ниетледен сакълау жаны бла иш тамамланады. Былтыр Къабарты-Малкъарны 100-жыллыгъы белгиленнгени бла байламлы кёрмючле къуралгъандыла, окъуучуланы тарых болумла бла шагъырейлендиргендиле, эришиуле, оюнла къуралгъандыла. Жаш окъуучулагъа сабий эм жаш тёлю китапны «Китап бла дуния жарыгъыракъды эм огъурлуду» деген ат бла бардырылгъан ыйыгъы сейир болгъанды. Ала «Эсгериуню от жарыгъы», «Сабийлеге урушну юсюнден окъуйбуз», «Блокадалы гыржын» эм башха акциялагъа, Россейни халкъларыны маданият хазналарыны жылына аталгъан башламчылыкълагъа тири къатышхандыла. Чекленнген онглары болгъан балалагъа энчи эс бёлюнеди, алагъа таплыкъгъа Сабий китапхана «Энчи бала» деген ресурс ара бла байламлыкъла жюрютеди. Алай бла озгъан жыл битеу да 554 мероприятие къуралгъанды, аланы кёбюсюн ётдюрюуге билим бериу учрежденияла, краеведение музей, Маданият ара, элледе маданият юйле бла башха организацияла къошулгъандыла. 

Библиотека ишде энчи жерни окъуучуланы чыгъармачылыкъ любитель биригиулери, кружокла бла клубла аладыла, алада адамла сейирлерине кёре билимлерин ёсдюредиле эм тенгле табадыла, фахмуларын ачыкълайдыла. Алай бла Терс-Къолда - «Юный книголюб», Нейтринода - «Горный родник», шахарда ючюнчю номерли филиалда - «Библионик», Ара библиотекада - «Почемучка», биринчи филиалда – «Родничок», Лашкутада - «Любознайка». Шахарда ючюнчю филиалда кёп жылны «Книгочей» ишлейди, сабий китапханада уа сахна оюнлары бла «Петрушка» гинжи клуб-театр къууандырады.

Окъуучуланы эришиулеге къатышдырыу да ахшы эсеплеге келтиреди. Юлгюге, былтыр В.Вороков атлы Культура фондда «Как слово наше отзовётся…» эришиуде бла «Забота о чтении – забота о будущем нации!» программада хорлагъанланы алгъышлау болгъан эди. Экинчисине къатышхан организацияладан эм тириге районну Ара библиотека системасы саналгъанды, саугъаланнганланы саны бла ол эм иги болгъанды. «Художестволу сёз» номинацияда тюрлю-тюрлю жыл санлада Тырныаууздан, Кёнделенден бла Терс-Къолдан жети адам хорлагъандыла. Библиотеканы бёлюмлери «Россейни белгилери» битеукъырал проектге эки жыл сан къауумда къатышхандыла. Сабий суратны Б. Пачев атлы библиотека бардыргъан «Биз ёсген жер» деген конкурсунда 11-14-жыллыкъланы араларында экинчи жерни Тырныауузну биринчи китапханасыны окъуучусу алгъанды.   

Лейла Назировна чертгенича, бусагъатдагъы жашауда библиотекачыны усталыгъын сайлагъан инсан окъуулу, тёгерекдеги дунияны юсюнден билими болгъан, башламчылыкълагъа хунерли, жангычылыкълагъа ачыкъ, огъурлу болургъа тийишлиди. Районну китапханаларында уруннганлада ол шартла бардыла, ала барысы да ишлерин сюедиле, айныйдыла, квалификацияларын ёсдюрюрча курсланы ётедиле, сёз ючюн былтыр талай заведующийле бла методистле Москваны бла Дондагъы Ростовну юйретиу араларында окъугъандыла.

Жууукъ заманнга борчланы юслеринден айта, Тебердиланы Лейла ала илму-методика эм инновация ишни андан ары бардырлыкъларын, окъуучуланы санына къошулурча, окъуучула библиотекалада тамамланылгъан жумушла бла тынч хайырланырча кюрешириклерин белгилейди. «Сабийлени бла жаш тёлюню керти, сау китапха сейирлерин къозгъасакъ, алагъа излемлерин ёсдюрсек, китапханалада бютюн кёп адам жыйылырына ышаныргъа боллукъду», - дейди ол.

Кульчаланы Зульфия хазырлагъанды.
Поделиться: