Терек бахчада ишленнген юйде прописка этер амал бармыды?

Федерал Кадастр палатагъа тюрлю-тюрлю соруула бла сёлешгенлени бир кесеги терек бахчачылыкъ эмда бахчачылыкъ бла байламлы законодательствону жашауда хайырланыуну юсюнден сорадыла, дейдиле КъМР-ни Экономиканы айнытыу министерствосунда. Аладан бири буду: «Быллай бахчада ишленнген юйде прописка этерге эмда аны «жашау журт» деген категориягъа къалай кёчюрюрге боллукъду?».

Министерствода ангылатханларына кёре, быйыл биринчи январьда 217-ФЗ номерли федерал закон кюч алгъанды. Анга тийишлиликде тюрлю-тюрлю дача биригиуле, коммерциялы болмагъан терек бахчачылыкъ неда бахчачылыкъ биригиуле деген даражаны алгъандыла, дача участкала уа быллай бахчалагъа саналып тебирегендиле. Аны бла энди биринчилеринде (терек бахчалада) юй орнатыргъа эркинлик бериледи, башхаларында уа тынгылы къурулуш бардырыугъа чек салынады. Ишленнген зат бир бош юйчюк болса, анда жаланда жылны кезиулерине кёре жашаргъа эркинлик бериледи. Алай ол тынгылы журт эсе уа, прописка этерге окъуна боллукъду.

- Бу закон кюч алгъынчы, юй жеринден тепдирилмеген мюлклени Бирикген къырал реестринде «жашаргъа жараулу» деген белги бла тургъан эсе, быйылдан башлап ол жашау журтха саналады. Алай аны белгиси «жашаргъа жарамагъан» деп, кеси да не гараж неда абериге жараулу объект тюйюл эсе уа, ол бахча юй болады, - деп белгилегенди Росреестрни Федерал кадастр палатасыны башчысыны орунбасары Марина Семенова.

Сиз прописка этерге сюйген быллай юй, тийишли къурулуш регламентлеге толусунлай келишип, сагъынылгъан реестрде жашау журтча алай турургъа керекди. Аны бийиклиги 20 метрден артыкъ, кесини да ючден кёп этажы болургъа жарамайды, отоулары уа фатарлагъа бёлюнмезге керекдиле. Дагъыда аны почта адреси да болургъа керекди.

Юйде сау жылны жашаргъа амал болурча, ол ток, таза суу, жылыу эмда газ (ол тийреде бар эсе аллай амал) бла жалчытыу сетьлеге, сора канализациягъа къошулуп болургъа керекди. Алай ол элде ара инженер коммуникацияла жокъ эселе, юй кеси да экиден артыкъ этажы болмай, анда сууу эмда канализациясы болмазгъа эркинлик бериледи.

Дагъыда отоуланы барында, ол санда ашханада, терезеле орнатыргъа  керекди. Отоуланы бийиклигин а эм азындан 2,5 метр этерге. Жашау журтда сау жылны эм азындан 18 градус жылыулукъ жалчытыргъа онг болургъа тийишлиди.

Юйню категориясын жер-жерли самоуправленияны органы тюрлендирирге боллукъду. Аны бахча юйге кёчюрюрча иеси ары заявление жазып берирге, анга да иеликге шагъатлыкъ этген документлени къошаргъа (сёз ючюн, ЕГРН-ден выписканы) керекди. Юйню энтта да иелери бар эсе, аладан да (бирге нотариусха барып) эркинлик алыргъа тийишлиди.

Журтну артха, жашау этерге жараулу категориягъа тюрлендиреме дегенде, кадастр инженерден техника заключение алыргъа керексиз. Бу ишни ол ай бла жарымны ичинде тамам этерге борчлуду. Андан жууап алгъандан сора уа, МФЦ-гъа барып, заявление жазаргъа тийишлиди.