Казбек Коков Къабарты-Малкъарны саулукъ сакълау учрежденияларында халны кёргенди

КъМР-ни Башчысыны къуллугъун болжаллы халда толтургъан Казбек Коков Къабарты-Малкъарны  саулукъ сакълау учрежденияларыны талайында болгъанды, ол санда Республикалы клиника больницаны, Чегемде район больницаны, Онкология диспансерни жокълагъанды.
    Республиканы оноучусу КъМР-ни саулукъ сакълау министри Марат Хубиев эмда Нальчикни мэри Таймураз Ахохов бла бирге Къан тамырлары ауругъанлагъа бакъгъан регион арада, Республикалы клиника больницаны торакал, хирургия эмда урология бёлюмлеринде, бир жолгъа кёп органларын ачытханлагъа бакъгъан бёлюмде халгъа къарагъанды. Специалистле республикада жашагъанла Къабарты-Малкъардан тышына кетмей не тюрлю бийик технологиялы медицина болушлукъ алыргъа боллукъларыны юсюнден билдиргендиле. Жаланда быйыл бийик даражада 190 чакълы бир операция бардырылгъанын, ол санда стентирование, эндопротезирование да этилгенин айтхандыла.
      Чегемни район больницасында Казбек Коков хирургия, офтальмология, неврология бёлюмледе болгъанды.  Терапия бёлюмге ремонтну белгиленнген заманнга бошаргъа, аны ырысхы-техника онгларын кючлендирирге  кереклисин чертгенди.
    Онкология диспансерде уа бу медицина учреждениягъа багъыу жерле жетмегенини юсюнден сёз баргъанды. Саулукъ сакълауну министри айтханнга кёре, хирургия эмда химиотерапия бёлюмле  Перинатал араны Нальчикде Шортанов орамда эркин болгъан отоуларына кёчюрюллюкдюле. Анда дагъыда реанимация блокну да ачар умут барды. Поликлиниканы эски мекямында ремонт этилгенден сороа уа, кюндюзгю стационар да кенгертилликди.
     Медицина учрежденияны башчылары, коллективи эмда саусузла бла да ушакъ баргъан кезиуде, дарманла бла жалчытыуну, медиклени хакъларыны, аланы усталыкъларыны, саулукъ сакълауда оноу этиуню къыйматлы болгъаныны бла къалгъаныны юсюнден сёлешиннгенди.
    Ол кюн окъуна Казбек Коков терк медицина болушлукъ бериуню «В» класслы жангы автомобильлеге къарагъанды. Кёп болмай аладан 23-сю жиберилгенди да, ала Катастрофаланы медицинасы арагъа, Нальчикде  терк болушлукъ берген станциягъа эмда аны районлада бёлюмлерине жиберилликдиле.

КъМР-ни Башчысыны бла Правительствосуну пресс-службасы.
Поделиться: