Сюймекликни бла кертичиликни кюнюню байрамы

Элбрус райондан жыйырма беш жылны келишиулюкде бла сюймекликде жашагъан  юч сыйлы юйюрге жамауат  саугъа – «Сюймеклик эмда кертичилик ючюн» майдалла берилгендиле. Байрам  Къулийланы Къайсын атлы Маданият юйде  бардырылгъанды.

Элбрус районну башчысы Залийханланы Къаншаубий, къонакъланы байрам бла алгъышлап, жаш тёлю тамата тёлюден кёргенин  этгенин, тин къыйматланы, маданият тёрелени багъаларгъа гитчеле абаданладан юйреннгенлерин белгилегенди. Ол кёп сабийли юйюрлеге, сабийле алып ёсдюргенлеге жюрек халаллыкълары, тёзюмлюлюклери ючюн энчи ыразылыгъын билдиргенди.

«Тиширыуланы совети» район жамауат организацияны таматасы  Ахматланы Мариям да, байрамны магъаналылыгъын чертип, алгъышлау сёзюн айтханды. «Юйюрню, сюймекликни эм кертичиликни  байрамы  жамауатны эсин тин къыйматланы, миллет маданиятны, тёлюледен тёлюлеге ётген тарых байлыкъны сакълауда юйюрню энчи магъанасына бурургъа аталгъанды», - дегенди ол.

Огъарыда сагъыннганыбызча, майдалланы Непеланы Борисни бла Зарема Халкечеваны, Ахматланы Мурадинни бла Ферузаны, Атмырзаланы Сапарны бла Латенаны юйюрлери алгъандыла. Саугъаланнганла да кеслерини жанларындан район администрациягъа  алагъа эс бёлгенлери ючюн ыразылыкъларын айтхандыла. Байрам ингирни бютюн жарыкъ этгенле уа Элбрус районну Маданият управлениясыны артистлери болгъандыла.