«Шахарланы шёндюгю болумларын къурау» деген проектни чеклеринде Нальчикде, Бахсанда, Терекде эм Прохладныйде кёп къатлы юйлени арбазлары эмда жамауат аслам жыйылгъан жерле жангыртылгъандыла. Былтыр а бу программаны чеклеринде республиканы ара шахарында 80-ден аслам арбаз бла Къулийланы Къайсынны эмда «Россей бла 400 жыл» эсгертмелени тийрелеринде майданла тапландырылгъан эдиле. Бу жумушла «Единая Россия» политика партияны башламчылыгъы бла бардырылгъанларын белгилерчады.
Бу кюнледе уа КъМР-ни Парламентини Къурулуш, жашау журт-коммунал мюлк эм отлукъ-энергетика эмда Промышленность, транспорт, связь эм жол мюлк жаны бла комитетлери бирге бардыргъан жыйылыуларында быйыл программа къалай толтурулгъаны сюзюлгенди. Анга спикерни орунбасарлары Михаил Афашагов бла Жанатайланы Салим, КъМР-ни Башчысыны бла Правительствосуну Парламентде эм сюд органлада келечиси Мадина Дышекова, комитетлени таматалары Валерий Гриневич бла Владимир Гугов, жер-жерли власть органланы келечилери къатышхандыла.
Михаил Афашагов шахарланы бла эллени халларын тапландырыу артыкъда магъаналы иш болгъанын, алай анга ахча асламында жетишмей, кёп къатлы юйлени арбазлары осал халгъа жетгенлерин чертгенди. Бу партия программа уа ол кемчиликни кетерир мурат бла хазырланнганды, кеси да бюджетге кирип, регионлагъа ахча бёлюнюрча мадарла этилгендиле. «Алай бла орамларыбызны сыфатларын жангыртыргъа къолдан келгенди. Аны бла бирге уа адамларыбызны оюмларын билирге, аланы да къыралыбызны жашаууна къатышдырыргъа онг болгъанды»,-дегенди ол.
Программаны жашауда бардырыргъа ахча федерал арадан бёлюнеди, алай регион эмда жер-жерли власть органла да анга кеслерини юлюшлерин къошаргъа керекдиле.
Сёз ючюн, Нальчикде муниципал программагъа 8 арбаз бла халкъ аслам жыйылгъан бир жер кийирилгенди. Шахарны администрациясыны ЖКХ эм тапландырыу жаны бла управлениясыны башчысыны къуллугъун толтургъан Руслан Афашаговну айтханына кёре, битеу борчла заманында толтурулгъандыла, бёлюннген ахча толусунлай къоратылгъанды. Ол санда арбазлада чыракъла, шинтикле, урнала орнатылгъандыла, асфальт жангыртылгъанды, эски терекле кетерилип, жангылары орнатылгъандыла, башха ишле толтурулгъандыла.
Программагъа кёре уа, 2019-2022 жыллада энтта 54 арбазны тап халгъа келтирирге керекди. Болсада анга тюрлениуле кийирилип, объектлени саны, ахчаны ёлчеми да кёбейтилирге боллукъдула. Докладчыны айтханына кёре, аны юсюнден тилек Инфраструктура эм цифра жаны бла айнытыу министерствогъа берилгенди.
Фонтанны юсюнденн айтханда уа, шахарчыланы тилеклери бла аны тарых сыфаты къайтарылгъанды. Аны бла бирге уа чыракъла орнатылып, ол кече жарытылырча да этилгенди.
Былтыр партия программа жаланда Нальчикде бардырылгъан эсе, быйыл а анга Прохладный, Бахсан эм Терек шахарла да къатышхандыла. Прохладныйде бу жумушлагъа 18,4 миллион сом бёлюннгенди, бу ахчагъа уа парк, халкъ аслам жыйылгъан эки жер эмда тогъуз арбаз жангыртылгъандыла. Шахарны администрациясыны башчысы Игорь Тараевни айтханына кёре, проект Прохладныйни сыфатын ариу этерге, адамла сюйюп солугъан жерлени айбатландырыргъа онг бергенди.
Бахсанда уа 8 арбазда бардырылгъандыла ремонт ишле. Шахарны администрациясыны башчысыны орунбасары Назир Кардановну билдиргенине кёре, анга 10,9 миллион сомдан аслам бёлюннгенди. Аны бла бирге уа «Гитче шахарланы парклары» деген партия проектни чеклеринде былтыр солуу паркда башланнган жангыртыу ишле ахырына жетдирилгендиле. Анга уа 2,2 миллион сом бёлюннгенди. Энтта жамауатны асламыны тилеги бла Али Шогенцуков атлы маданият юйню аллында майдан да жангыртылгъанды (5,4 миллиондан аслам берилгенди).
Терекде уа 9 арбаз тапландырылгъанды, аланы тийрелеринде юйледе 1,7 мингден аслам адам жашагъанларын белгилерчады. Къурулуш ишлеге 9,1 миллион къоратылгъанды. Районну башчысыны орунбасарыны къуллугъун толтургъан Аскер Алхасовну айтханына кёре, программа къалай толтурулгъанына жамауат энчи эс бургъанды. Адамла хар арбазгъа кеслерини белгилерин салгъандыла. Алай бла бек аламат проект сайланып, сабий оюн майдан орнатыргъа сертификат бла саугъаланнганды.
Кенгешде сёз арбазланы дизайн проектлерини, толтурулгъан ишлени качествосуну, партия программагъа мындан ары къатышыуну юслеринден баргъанды. Дагъыда жамауат тири болмагъанына, адамла дизайн проектлеге кереклисича эс бурмагъанларына, жангыртыу жумушлагъа кеслерини юлюшлерин къошаргъа ашыкъмагъанларына тарыкъгъандыла.
Жыйылыуда этилген битеу предложенияла жыйышдырылып, жууаплы органлагъа эсгертиуле этилгендиле. Ол санда жер-жерли власть органлагъа жангыртыу ишлени андан ары бардырыргъа, толтурулгъан жумушланы качествосун, ахча къалай къоратылгъанын контрольда тутаргъа кереклиси белгиленнгенди.
