Огъурлу адам, хунерли устаз, чынтты насийхатчы

Биз таныгъан эмда сюйген адамыбыз арабыздан кетсе да, бизни эсибизде ёмюрден ахыргъа къалады.      Огъары Малкъарда 1-чи номерли мектепде математикадан устаз болуп ишлеген Мамайланы  Мухадинни жашы Мустафа сёзсюз,  окъуучуларыны эсинде  кёп жыллагъа огъурлу ишлери, ариу сёзю, жюрек халаллыгъы бла къалгъанды.

«Ол бизге билим бериу бла чекленип къалмай, не заманда да игилик этерге, халаллыкъгъа, бир бирни ангылаулукъгъа, бийик патриот сезимлиликге, ата журтубузну, элибизни, адамланы сюерге юйретиучю эди. Хар окъуучусуна таза ниетлилиги, ачыкъ жюреклилиги, не гитче затыбызны да эслей билгени бла  мектепге келген биринчи кюнюнден башлап, кесин  уллугъа, гитчеге да сюйдюргенди. Биз аны  бир заманда да ауазын кётюрюп эшитмегенбиз, бек башы уа сабийлени игилеге бла осаллагъа  юлешмегенди. Барыбыз да бир эдик анга. Биз аны дерслерине бек сюйюп барыучу эдик, дерсни   ангыламасагъ а ол заманын да аямай, аны ангылатхынчы  къоймаз эди»,-дейди  аны окъуучусу Хозаланы Фатимат.

Мамайланы Мустафа  1955 жылны 13 февралында  Къазахстанда туугъанды.  Андан къайтхандан сора уа 1973 жылда Къабарты-Малкъар къырал университетни физика-математика факультетине киргенди.     Ол жыл окъуна  Огъары Малкъарда  мектепде ишге тохтайды. Бир кесекден а  сабыр акъыллы жашны    билим бериу жаны бла директорну орунбасарына да саладыла. Он жылдан артыкъ заманны дерсле да бере, ол ишни да тындырады. Аны бла да къалмай, жыйырма жылны ичинде  математикадан устазланы муниципал  методика биригиулерине башчылыкъ этгенди мектепни  башчыларыны советини таматасы да болгъанды.

Бийик категориялы устаз, РФ-ни битеулю билим бериу жаны бла сыйлы ишчиси,  окъуу юйде ишлеген жылларыны ичинде кесин чынтты профессионалча,  кёпню билген  аламат устазча  кёргюзтгенди. Ишлеген заманында чыкъгъан  жангы технологияланы да  олсагъат   дерсинде хайырланнганды. Бир тюрлю  жангычылыкъ ишде да ол абызырамай,  аны къолгъа алып бардыргъанды. Мустафа Мухадинович компьютер технологияланы эмда  билим бериуде оюн амалланы да ишинде женгил хайырланнганды, кеси дерслерине дидактикалы материалланы да айырып, жарашдыргъанды. Андан сора да, кёп жангычылыкъланы кийирирге да къоркъмагъанды. Ала окъутуу-юйретиу ишинде кеслерини  магъаналарын, тюзлюклерин, таплыкъларын да  кёргюзтгендиле.

Сабийле бла ишлеуде Мустафа Мухадинович  не заманда да эм башха бир борчну салгъанды: ол окъутхан жашла бла къызла тюз акъыллыла,  башха адам бла  сёлеше билгенле, социал жаны бла  билимлиле, жашауда жерлерин таба билгенле болурларын излегенди.

Кёп жылланы  бет жарыкълы  ишлегени, билим бериуге кийирген жангычылыкълары эмда кёп тёлюлени   окъутханы  ючюн  Мамай улу  КъМР-ни  Билим бериу, илму эмда жаш тёлюню ишлери жаны бла  министерствосуну, районну билим бериу управлениясыны   сыйлы   грамоталарына , саугъаларына да бир ненча кере тийишли болуп тургъанды.

Иги  къураучу, аламат педагог,  керти, не заманда да кимге да болушлукъгъа  ашыгъып келген  адам Мамайланы Мустафа Мухадиновични  биргесине ишлегенлени, окъуучуларыны, эллилени  араларында да намысы, дебери не заманда да бийикде жюрюгенди. Ол  бек иги ата, баш ие, аппа   да эди. Юйюрю ючюн жанын берирге хазыр, аланы тынчлыкълы жашаулары, монглукълары  ючюн  кече, кюн демей  ишлерге  хазыр эр киши. Къыйын ауруп, тёшекге тюшгенинде да ол кесини ариу сёзю, акъылы бла кёплеге  болушлукъ этерге, кёллендирирге  кюрешип тургъанды.