Къыралны бай эм къолайсыз регионларыны тизмеси жарашдырылгъанды

«РИА Новости» къыралда адамла къайда эм бай, къайда уа эм жарлы жашагъан регионланы тизмелерин жарашдырырча, тинтиуле бардыргъанды. Аланы эсеплерине кёре, халкъларыны къолайларыны игиликлерине кёре биринчи жерледе Ямало-Ненецкий, Ненецкий эм Чукотка автоном округла барадыла. Магадан, Сахалин областьлада, Ханты-Мансийск автоном округда,  Москва эм аны областында, Санкт-Петербургда бла Татарстанда тургъанла да тарыгъырча тюйюлдюле. Къолайлары эм къарыусуз а Тувада, Алтайда,  Къалмукъда, Марий Элде, Кърымда, Еврейская автоном эм Курган областьлада, Чувашияда, Шимал Кавказны талай регионларында жашагъанладады.

Жарлылыкъ къыралны жер-жерлеринде бирча жайылмагъанды. Москвада файдалары жашау этерге керекли ахчаны ёлчемине жетмеген гражданланы саны 1 процент да болмайды, дагъыда жети регионда хал алайыракъды. Адамланы факъыралыкъ бегирекда Тувада къысханды, бек жарлыла анда халкъны 9 процентидиле.

Эсгертиу: тизмени жарашдыргъанда, адамланы файдалары, жашау этерге керекли затланы багъалары алыннганды, тюрлю-тюрлю регионлада факъыралыкъны къаллай бир адам сынагъанына да къаралгъанды.