Европаны бла дунияны чемпионатларына къатышыргъа эркинликни къоруулагъандыла

Уфада бел бауладан тутуп тутушуудан Россейни чемпионаты къуралгъанды. Ахыр жыллада бардырылгъан эришиуледен ол эм уллу болгъанды – анга къыралны 32 регионундан 300-ге жууукъ эм кючлю гёжеф къатышхандыла, деп билдиргендиле Къабарты-Малкъарны Черек районуну пресс-службасындан. 

Спортчула майдалла ючюн 3 кюнню тутушхандыла. Бизни республиканы командасы асламысында Черек районну 1-чи эм 2-чи номерли спорт школларында (директорлары Гажонланы Ю.И. бла Гешев О.М.)  жарау этгенледен къуралгъанды, аланы баш тренерлери Гажонланы Юрий болгъанды. 

Бийик усталыкъларын кёргюзтюп, биринчи жерлени Эфендиланы Расул (100кг., Къашхатау) бла Артур Сокуров (90кг., Жемтала) алгъандыла. Кюмюш майдалланы Хачим Докшукин (+100кг., Жемтала), Мурзабек Мисостов (+100кг., Зарагиж), Эльдар Гоноков (90кг., Анзорей) къытхандыла. Ючюнчю жерлеге Улбашланы Мартин (62кг., Жемтала) бла Рустам Иванов (90кг., Зарагиж) чыкъгъандыла. Ала энди Европаны бла дунияны Самарада бла Казаньда ётерик чемпионатларында эриширикдиле.