«Мында къонакъбай, чомарт, ёхтем адамла жашагъанларына тюшюннгенме»

Журналистни жоллары кёп сейир адамла бла тюбешдиредиле. Аны ючюн сюеме мен бу усталыкъны. Мени да аллай тюбешиулерим кёп болгъандыла. Кертиди, бирле эсингде къаладыла, бирле уа – угъай.   Белгили россейли актёр эмда жырчы Александр Дьяченко бла тюбешиуюм, ушакъ этгеним да аллай унутмазлыкъ кезиулеримден бири болгъанды. 

Аланы  санында  ара телевидения бла кёргюзтюлген «Брак по завещанию» деген, дагъыда кёп башха  телефильмледе баш рольну ойнагъан актёр эм жырчы Александр Дьяченко да бар эди. Ол республикагъа жюрини къауумунда келгенди. Ма аны бла болгъан эди  мени ушагъым. 

Ол  Нальчикге  «Россейли  студент жаз башы» деген битеуроссей фестивальгъа келген эди. Кеси да жюрини къауумуна киргенди. Александр Станиславович республикабызгъа биринчи кере келгенин, алай Элбрусну, Чирик кёлню, Чегем чучхурланы юслеринден а башхала айтып билгенин хапарлагъан эди.

- Заманым бек азды, алай, башха ариу жерлеригизге баралмасам да,  Минги тауну тийресин а жокъламай къоярыкъ тюйюлме. Канат жол бла ёрге кётюрюлюрге термилип турама,-деген эди актёр. 

-Бизни республиканы адамларыны юсюнден а не айтыргъа боллукъса?-деп сорама мен.

-Къайсы миллетге, къайсы халкъгъа, жерге да  аны адамларына кёре багъа бериледи.  Мында тургъан беш кюнню ичинде бир осал адамгъа тюбемегенме. Керти да, жомакълада айтылгъанчады къонакъбайлыгъыгъыз а. Жарыкъ адамла, ышармай сёлешмейдиле. Аны бла бирге уа  ёхтемле. Малкъарлыла, къабартылыла бла да тюбешгенме, жарсыугъа, къайсы ким болгъанын ангылаялмайма, аланы хар бири да орусча ариу, тап сёлешедиле. 

Миллет тепсеулеригиз а! Не гитче сабийчик да  аламат устады. Ол бек хычыуун кёрюнеди. Мен «Балкарияны», «Кабардинканы» да тепсегенлерине уллу сейир этип, сюйюп къарагъанма. Республикада, манга айтханларына кёре,  кёп миллетлени келечилери,  бир бирлери бла  жарашып, мамырлыкъда жашайдыла. Ол да сукъланырча шартды. 

Шахарыгъыз ариуду, тазады, тёгерекде гюлле, юлкюле, терекле да кёпдюле. Мен Россейни  кёп регионларында, тыш къыраллада да  болгъанма, тенглешдирир онгум барды, Нальчикни  бек жаратханма.

-Онг болса, дагъыда келип, таула тийресинде, Чирик кёлню боюнунда неда Чегем чучхурланы къатында да солур муратынг а бармыды?

-Сёзсюз. Бу жол онгум болмагъанды. Алай билеме, мында тынчлыкълыды, къонакъбайлы, чомарт халкъла жашагъанларын да. Бир онг табып, бери  келмей къаллыкъ тюйюлме.

ХОЛАЛАНЫ Марзият.
Поделиться: