Бизнес бла кюрешгенлеге тюрлениулени юсюнден

Налогла

Биринчи январьдан башлап, Россей Федерацияда Бир налог счёт (ЕНС) деген зат чыкъгъанды. Энди битеу энчи предпринимательле эмда предприятияла бла организацияла налогларын, страховой эмда башха тюрлю тёлеулерин, тазирлерин, процентлерин, пеняларын да энчи бир казна счётха кёчюрюп башларыкъдыла. Ахчаны ары салырдан алгъа жаланда аны номерин эмда ИНН-ны жазаргъа керек боллукъду. Аладан башха бир затда угъай.

Дагъыда «Бир налог тёлеу» (ЕНП) къуралгъанды. Аны хайыры бла предпринимательле талай тюрлю налогларын бир тёлеу къагъыт бла берип къутулургъа боллукъдула. Ахча жерине жетсе, ол ЕНС-де кёрюнюрюкдю. ЕНП бла ма бу налогланы тёлерге онг барды: НДС, НДФЛ, НДПИ, УСН, тюшюрюлген файдагъа, мюлкге, транспортха, дагъыда сатыу-алыу эмда страховой тёлеулени.

Кредит солуу кезиу

Талай бёлюмледе къармашхан гитче эмда орта бизнесге кредит каникулланы болжалын быйыл биринчи мартха дери созгъандыла. Аны тийишли реестрге тюшген бёлюмледе ишлеген предпринимательле хайырланыргъа боллукъдула.

Налог льготала

Колледжлеге эмда техникумлагъа оборудованияларын, мюлклерин неда ахчаларын алай, хакъсыз берген предпринимательле НДФЛ налогларыны бир кесегин артха алыргъа эркиндиле. Аны ёлчеми бла байламлы оноуну регионла кеслери этерге керекдиле.

Касса техниканы хайырланыу

Белгиси болгъан товарны сатханда контроль-касса техниканы хайырланыу жорукъла озгъан жылны ахырында тюрлендирилгендиле. 597-ФЗ законда айтылгъаныча, аллай товарла сатыучула бир-бир кезиуледе маркировка кодну орунуна товарны кодун кёргюзтюрге эркиндиле. Ол а, сёз ючюн, аберини вендинг аппарат бла сатханда тюберге боллукъду. Аны экранында QR-код кёрюнсе, чекни къагъытха чыгъармазгъа эмда аны алыучуну электрон почтасына неда телефонуна СМС бла жибермезге жарайды.

Налог билдириуле

Энди предпринимательле НДФЛ тыйылмай тергелген налогну, аванс неда страховой тёлеулени ёлчемлерини юсюнден ФНС-ге билдириу жиберирге керекдиле. Ол кеси да НДФЛ, мюлк, транспорт, жер эмда УСН халда налогланы юслери бла хар ай сайын берилген тёлеуле бла байламлыды.

Ишге алгъанланы онгдуруу

Адамланы кеслерине ишге алгъанланы субсидияла бла онгдуруу программаны болжалы быйылны ахырына дери созулгъанды. Аны чеклеринде бизнесге къыралдан юч МРОТ тенгли ахча бериледи. Ахчаны организация жабылып неда анда уруннганланы саны азайтылып ишсиз къалгъанланы кеслерине алгъанлагъа кёчюрлюкдюле. Хакъсыз отпускагъа жиберилгенле, толу кюн ишлемеген графикге кёчюрюлгенле, ишден къуру къалыргъа боллукъла да бу программагъа тюшерге боллукъдула.

Къырал отуз жыллары толмагъанланы ишге алгъанланы да онгдурады. Ол санда сынамлары болмагъанланы эмда вузланы кёп болмай тауусханланы да. Биринчи субсидия предпринимательге ай озгъандан сора бериледи. Экинчиси – юч, ючюнчюсю уа – алты айдан сора.

Бизнесни тинтиуге чек

Бизнес бла кюрешгенлени ишлерин тинтиуге салыннган чекни болжалын Правительство энтта да бир жылгъа созгъанды. Сёз мында Роскомнадзорну, МЧС-ни, Ростехнадзорну, урунуу инспекцияны эмда башха ведомстволаны юслеринден барады.

Алай бир-бир компаниялагъа уа аллай онг берилмейди. Ол а бек къоркъуулу ишле бла кюрешген неда аллай объектледе, сора дагъыда экинчи класс гидротехника мекямлада (эмда мекямла бла) ишлеген предприятияла бла организацияладыла. 

Пландан тышында тинтиуле хайырланыучуланы неда ишчилени тарыгъыулары бла бир тюрлю чек салынмай бардырыллыкъдыла. Налог служба да предпринимательлени ишлерин тинтирге эркинди.

Онгдуруу

Экономикада бла политикада болум къыйынды, аны бизнес да кесини ишинде сезмей къалмайды. Эм биринчиден мобилизациягъа чакъырылгъан предпринимательлеге къырал ма былай себеплик этеди:

- отчётланы эмда налогланы артда берирге боллукъду;

- отчёт берилмегени ючюн тазир салынмайды, расчёт счёт да жабылмайды;

- тинтиуле бардырылмайдыла, налог контроль да этилмейди;

- предприниматель кесини бизнесин башхагъа буюрургъа боллукъду;

- ИП-ны электрон халда къол салмай неда налог инспекциягъа бармай жабаргъа жарайды.

Мобилизациягъа чакъырылгъан предпринимательлеге себеплик этиу амалланы тизмеси тюрлене неда кенгертиле барыргъа боллукъду. Ала бла шагъырейленирча налог службаны сайтына къарай турургъа керекди. Соруугъуз бар эсе аны да анда берирге амал барды.

Биз мында кёргюзтгенледен сора бизнесге энтта да кёп тюрлю онгла бериледиле. Толуракъ информацияны «Мени бизнесим» деген порталда табарыкъсыз. Анда льгота кредитлени, жаш предпринимательлеге грантланы, инвестициялы проектлеге себеплик этиуню эмда кёп тюрлю башха ишлени бла жумушланы юслеринден жик-жиги бла айтылады.