Эм багъалы харбызны багъасы – 7 минг доллар

Японияда «дэнсукэ» сортлу къара  харбызланы сатыуну  биринчи аукциону болгъанды. Kyodo агентстводан билдиргенлерине кёре, ол къыралны Асахикава бла Саппоро шимал шахарларында бардырылгъанды. Сейир иш а Асахикавада болгъанды – анда 11 килограмм тартхан харбызны 750 минг иенагъа - 7,2 минг долларгъа - сатхандыла. Алай бла анда Хоккайдода 2008 жылда болгъан рекордну 1 минг долларгъа озгъандыла. Багъалы харбызны уа супермаркетни иеси Кэйити Судзуки алгъанды. 

 

Судзуки айтханнга кёре, анга бу аукционнга къатышыу бек магъаналы эди. «Анда хорлагъаным бизнесим иги баргъанына шагъатлыкъ этеди, энди алгъадан да кёп файда тюшеригине ийнанама»,- дегенди ол. Тёгерек, сыйдам харбызны анга  къызыл оруннга салып бергендиле. Бу сортну къабугъу, башда айтылгъаныча, къарады, ызлыкълары кёрюнмейдиле, ичи къып-къызылды, бек татлыды, ташлары уа аздыла. 

 

Хоккайдода багъалы харбызладан 55 мингин ёсдюргендиле, аланы хар бири 80-100 доллар турады. Японияда быллай багъалы кёгетлени сатыу бла байламлы аукционла дайым къураладыла. Сёз ючюн, быйыл дагъыда «юбари» сортлу эки хуанны 45 минг долларгъа сатхандыла, ала  ийислери эм ичлерини къызгъылдым тюрсюнлери бла энчидиле.