Бирлешип къармашыуну дурус кёргендиле

КъМР-ни Промышленность  эм сатыу-алыу министерствосунда ведомствону  башчысы Шамиль Ахубеков эм  аны орунбасары Жарашууланы Алим Шимал Осетияны промышленность эм транспорт министри Хайдарбек Бутов бла тюбешгендиле. Ушакъны кезиуюнде  эки республиканы  предприятияларыны арасында ишчи байламлыкъла къурауну, светодиод продукция чыгъарыу бла кюрешген компанияланы кючлерин бирикдириуню эмда хазыр продукцияны сатыуда бирлешип къармашыргъа кереклисини юсюнден  айтылгъанды.

Регионланы арасында быллай къыйматлы байламлыкъла къуралсала, ол эки жанына да файдалы болурун чертгендиле министерстволаны келечилери. Биринчи атламны орунуна уа Къабарты-Малкъардан «Телемеханика» бла «Кавказкабель-ТМ» компанияла, РСО-Аланиядан «Заря Осетии» эм «Бином» предприятияла, сора Дагъыстандан мияла  завод да къошулуп, светодиод, светотехника эм электрон продукция чыгъарыу жаны бла проектни бардырыргъа оноулашхандыла.

Шёндюледе аны бла байламлы документацияны хазырлау барады, анга ким къаллай къошумчулукъ этериги тохташдырылады эмда маркетинг тинтиуле бардырыладыла, деп билдиргендиле министерстводан.