Жигитлиги - ёсюп келген тёлюге юлгю

Мечукъаланы Мурадин 1941 жылда  комсомолну буйругъу бла НКВД-гъа келеди. Жашха мында  бек  къыйын эмда къысха заманны ичинде толтурулургъа керек  болгъан тасхачы буйрукъланы берип тургъандыла. Ол кесини профессионализмин кёргюзтгенди.

Аны юсюнден Къабарты-Малкъар АССР-ни Къырал къоркъуусузлукъ комиссариатыны (НКГБ) ара архивинде быллай шартла бардыла: «Къабарты-Малкъар ючюн баргъан урушда 1942 жылда 15-чи августда НКГБ-ны буйругъу бла Мечукъа улу немисли фашистлени тылына – Пятигорскга бла Кисловодскга – жибериледи. Аны бла Василий Фалько бла Гриша Образков барадыла. Жашла буйрукъну тийишлисича толтурадыла – Мечука улу немислилени штабыны бек магъаналы документлерин алып келеди. Ол угъай, жашла аскер училищени 29 курсантын къуршоудан чыгъарадыла».

Бир ай да озгъунчу  Мурадинни дивизияны штабына жангыдан чакъырып, энтта бир буйрукъ бередиле. Аны немислилени къолунда болгъан Прохладный шахаргъа бла Алтуд элге жибередиле. Бу жол фашистледе къаллай техника болгъанын билирге керек эди. Аны бу къоркъуулу ишге Левченко ашыргъанды.    Командирлени буйругъун толтуруп, таулу жаш совет аскерле бла байламлыкъ жюрютген адамгъа керекли эм магъаналы билдириу береди. Алай Алтуд элден чыгъа баргъанда уа совет разведчикди деп, фашистлени къолларына бередиле.

Жашха соруу кече узуну этилгенди. Анга азап сынатханларында да, ол къырал тасханы айтмагъанды. Немислиле жашны сындыралмагъанларындан сора аны кёзлерин чыгъаргъандыла. Эрттенликде уа, илишаннга салып, автоматдан атдырып ёлтюредиле. Ол заманда анга жыйырма жыл да толмагъан эди. 

Архивде ол Грабовецкий элде (бусагъатда Прохладна районну Благовещенское элиди) асыралгъаныны юсюнден айтылады. Алай бюгюн да аны къабыры къалайда болгъаны белгисизди.  

1965 жылда 8 майда СССР-ни Баш Советини Президиумуну бегими бла Мечукъаланы Мурадинни Къызыл Жулдузну ордени бла саугъалагъандыла (ёлгенден сора). Огъары Малкъарны орамларындан бирине жигитни аты аталгъанды.

ТОКУМАЛАНЫ Салим.
Поделиться: