Закийни аты унутулмазча

12 ноября, 2022 - 14:00
Алгъаракъда билдиргенибизча, Магас шахарны администрациясы Къулийланы Къайсынны 105-жыллыгъына жораланнган чыгъармачылыкъ конкурсну бардыргъанды. Анга къатышыргъа сюйгенлени жыл санларына чек салынмагъанды. Эсселерин бу эришиуге школчула бла бирге пенсиячыла да жиберирге эркин эдиле. Озгъан ыйыкъда, аны эсеплерин чыгъарып, хорлагъанланы саугъалагъандыла. 
Конкурсну баш магъанасы – ёсюп келген тёлю белгили назмучуларыбызны бла жазыучуларыбызны билирча, аланы атлары унутулмазча этиудю. Алай бла 2 ноябрьде Магасны администрациясында Ингушетиядан эм Къабарты-Малкъардан келгенлени къатышыулары бла бу ишде хорлагъанланы саугъалау болгъанды. Бизни республикадан жюрини къауумунда КъМР-ни Журналистлерини союзуну таматасыны къуллугъун толтургъан Шауаланы Разият бла назмучу Мусукаланы Сакинат да ишлегендиле. Разият Аслановна айтханнга кёре, конкурс ишлени жюрини келечилерине энчи номерле бла жибергендиле. Башхача айтханда, аланы авторлары кимле болгъанлары белгисиз эди. Алай бла жюриге киргенлеге биреуге жакъ басар онг берилмегенди эм аны эсеплери бир тюрлю кёзбаусуз чыгъарылгъанлары шартды. Ол къауумгъа кирген ингушлу назмучу Тамара Чаниева да конкурс ишле аламат жарашдырылгъанларын белгилеп, анда таулу сабийле жетишимли болгъанларына къууаннганын билдиргенди. 
– Шёндюгю сабийлени сейирлери быллай чыгъармачылыкъ бла кюреширге бек аз болгъанын барыбызда билебиз. Ол бек жарсытады. Аны себепли иш этип олтуруп, адабият эришиуге хазырланнганлары окъуна кёпню тутады. Сау болсунла, – деп чертгенди ол. 
Алгъадан билдирилгенича, конкурсда хорлагъанлагъа дипломла бла бирге ахча саугъала да болгъандыла. Саугъалауну уа Магасны администрациясыны башчысыны орунбасары Макка Зязикова бардыргъанды. 
Алай бла, конкурсну эсеплерине кёре, биринчи жерни  Хасанияны 16-чы номерли школуну 6-чы классыны окъуучусу Эмирхан Алагёз  алгъанды. Жашчыкъ 50 минг сом багъасы сертификатха бла дипломгъа тийишли болгъанды. Ол билдиргеннге кёре, ала юйюрлеринде ахчаны бир кесегин энчи операцияда болгъан аскерчилерибизге болушлукъгъа ётдюрюрге деп оноулашхандыла. Конкурсха уа ол сабий чыгъармачылыкъны «Кюн шахар» академиясыны атындан къатышханды. Анда Эмирхан «Свеча» деген адабият клубда хунерин ёсдюреди.
Экинчи жерге ингушлу жазыучу, назмучу эм публицист Якуб Патиев тийишли болгъанды. Кесини къысха сёзюнде ол малкъарлыланы бла ингушлуланы  кёчгюнчюлюкден тышында да Къулийланы Къайсын бирикдиргенин чертгенди.
– Биз бек ёхтемленебиз аны ингушлу киеу болгъаны бла. Аныча сыйы, намысы жюрюген, чынтты кишиликни белгиси болгъан адамланы атлары уа бир заманда да унутуллукъ тюйюлдю, – дегенди ол. 
Ючюнчю жерге да жюри нальчикчи Къулийланы Ансар, Къайсынны туудугъун, тийишли кёргенди. Ол «Успех» деген лицейни 8 классыны окъуучусуду. Жашчыкъ Магасха кеси баралмагъаны себепли, дипломну бла 20 минг сомгъа сертификатны аны устазы Газаланы Аслижаннга саугъалагъандыла. 
– Болмагъанча жылы, ариу тюбегендиле. Кесинги къонакъда болгъанча да сезмей эдинг. Бу конкурсну бардырып, ётдюргенлерине уа бек ыспас этеме. Сау болсунла, – деп чертгенди Аслижан Сюттюновна ушагъыбызны кезиуюнде. 
Конкурсха къатышып, фахмулулукъларын кёргюзтгенлени бир къаууму да сыйлы белгиле эм дипломла бла саугъаланнгандыла. 
 
 
Таппасханланы Аминат.
  • 14 просмотров
Поделиться: