Белгили алимле электроникада жангылыкъланы сюзгендиле

Къабарты-Малкъар къырал университетни Элбрус районда окъутуу-илму комплексинде «Электроникада микро- эмда нанотехнологияла» деген онбиринчи халкъла аралы илму-техника конференция бардырылгъанды. Аны ишине Россейден, Белоруссиядан эмда Азербайджандан техника эмда физика-математика илмуланы докторларындан 40-дан асламлы къатышханды, деп билдиргендиле КъМКъУ-дан.

Къонакъланы арасында электроникада, физикада, радиотехникада, физикалы химияда атлары айтылгъан, бизни къыралда электрониканы мурдору къуралгъанын кеслери кёзлери бла кёрген, аны айнытыугъа кёп къарыу салгъан белгили алимле бар эдиле. Россейни Нанотехнологияла жаны бла биригиуюню башчысы Виктор Быков, Москвада энергетика институтну профессорлары Анатолий Попов бла Александр Гуляев, Белоруссияны информатика эм радиоэлектроника жаны бла къырал университетини профессору Александр Смирнов, Азербайджанны илмуланы Миллет академиясыны физика институтуну профессору Садияр Рагимов эм башхала  коллегалары бла микроэлектроникада жангычылыкъланы сюзгендиле, илму жетишимлери бла да шагъырейлендиргендиле.

Форумну кезиуюнде 131 илму доклад окъулгъанды. Жыйылыуну ахырында уа жаш алимлени бла аспирантланы арасында бардырылгъан конкурсда хорлагъанланы саугъалагъандыла.

Конференцияны материаллары бары да тийишдирилип, альманахча басмаланырыкъдыла.