Токну урлагъанлагъа - бютюн уллу тазирле

Ток неда жылыу бла жалчытыучу сетьлеге эркинликсиз эмда бир ненча  кере къошулгъанлагъа энди алгъындан эсе юч кереге уллу тазир тёлерге тюшерикди.

Ары дери аны ёлчеми 10 минг сом  эди. Предприятиялагъа неда организациялагъа уа – жюз минг сомдан башланнганды. Энди уа биринчиле 15-30 минг сом, экинчилени уа  200-300 минг сом тёлерикдиле. Ол санда къуллукъчула эки-юч жылгъа ишлеринден къысталыргъа боллукъдула, аны юсюне 80-200 минг сом да тёлеп, деп билдиргендиле «Каббалкэнерго» компаниядан.

Бу тюрлениу, компанияда айтханларына кёре, РФ-ни Правительствосу къыралны отлукъ-энергетика комплексини  организацияларын къоруулаугъа игирек эс буруп башлагъаныны белгисиди. «Россетини»  эмда РФ-ни Энергетика министерствосуну шартларына кёре, быллай бузукълукъну бир кере этгенледен сегиз проценти, ол жылны ичинде аны энтта да къайтарадыла. Юч жылны ичинде уа аллайла онсегиз процентни тутадыла.