Болушлукъларын тийдирирге ашыкъгъандыла

Донорну битеудуния кюнюнде (14 июнь) Черек районда танымагъан адамларыны саулукъларына эмда жашауларына себеплик болур ючюн къан берирге келгенле аз тюйюл эдиле. Кёчюрюлюучю станция Къашхатауну арасында эрттенликде сагъат ондан башлап ишлегенди.

Жер-жерли самоуправленияны, учрежденияланы, организацияланы келечилери, эллиле да къан кереклилеге болушлукъларын тийдирирге ашыкъгъандыла. Акциягъа къатышханладан бири сагъынылгъан районну администрациясыны башчысы Муртазланы Борис болгъанды.

Трейлерни къатына алтмышдан аслам адам келип, процедураны аллында хакъсыз медицина тинтиуден ётгенди. Аны кезиуюнде уа терапевтни оюмуна эмда къанны лаборатория эсебине къаралгъанды.

Алай бла уа ала кеслерини саулукълары не халда болгъанларын  да билгендиле. Бир бирлеге уа къошакъ халда башха врачлагъа барып кёрюнюрге тийишлиси эсгертилгенди. Къан къуйгъан станцияда ишлегенле бу жумушха къатышханлагъа,  ыразылыкъларын билдирип,  ыспас этгендиле.

Бёзюланы Залина. Черек районну администрациясыны пресс-службасы.
Поделиться: