Багъыу иш качестволу толтурулурча

Къабарты-Малкъарны Перинатал арасында республиканы беш медицина организациясына: Нальчикни 1-чи, 2-чи номерли клиника больницаларына, Кёп профильли районла аралы больницагъа эм Прохладнаны стационарына   аудиторланы хазырлагъандыла. Ала учреждениялада  иш качестволу барырча къарарыкъдыла. Специалистлени Качество жаны бла миллет институтну таматасыны орунбасары Олег Швабский бардыргъанды.

Сагъынылгъан системаны магъанасы саусузланы къоркъуусузлукълары сакъланырча, менеджментни тирилтирча, качествону ёсдюрюрча эм медицина болушлукъ бла тынгылы жалчытыргъады. 

 Республиканы Перинатал арасы  качество жаны бла биринчи миллет  стандартланы сингдирген учреждение  болгъанды эм сертификацияны ётерге хазырды. Аудит бардырылгъандан сора, качество жаны бла миллет институтну келечиси Сергей Мартиросян Росздравнадзоргъа аны ишине уллу багъа бичгенди.

 - Перинатал ара   сертификацияны болжалдан алгъа ётерчады. Сертификат – аны къоркъуусуз болгъанын  эм качестволу медицина болушлукъ бергенин ачыкъларыкъды,- деп къошханды   Сергей Мартиросян.

Эсге сала айтсакъ, КъМР-ни Саулукъ сакълау министерствосу  «Национальный институт качества» учрежденияны бла  Росздравнадзорну мардалары бла излемлерине кёре медицина учреждениялада  качествону кётюрюрча мадар этеди. Ол амал бетеу стационарла да бардырыллыкъды.