Сёзю ётген, жашаугъа таукел кёзден къарагъан киши эди

Адамла тууадыла, ёседиле, жашайдыла,  ууахтылары жетсе  уа, кетедиле узакъ дуниялагъа, бир заманда да къайтмазча ызларына. Этген ишлери, айтхан сёзлери къаладыла ахлуларыны, жамауатны да эслеринде. Ала аны сагъыннган къадар аты айтылады, сыфаты унутулмайды.
 
Бу хапарыбызда аллай бир адамны юсюнден айтырыкъбыз. Аны кёпле да таныгъандыла. Бютюнда Чегем ауузунда. Ол  Хуртуланы Даулетаны жашы Мустафир эди. Ол кёп жылланы Чегем районда тюрлю-тюрлю къуллукълада ишлегенди. Ахшы ишлери бла белгили да болгъанды. Эллилерине, къолунда ишлегенлеге болушлугъун аямагъанды.
 
Жашлыгъыны, сабий жылларыны юслеринден айтханда, ол ата сёзюн эшитмей ёсгенди. Атасы жашы туугъунчу  урушха кетип, анда ёлгенди. Анасы Шамса аны гитчелигинден окъуна кеси аллына оюм этерге юйретгенди. Андан болур эди, хар этген ишин иги тинтип башлагъаны эм аны чегине жетдиргинчи тынчаймагъаны.
 
Мустафир окъуугъа да уллу кёл салгъанды. Школну бошагъандан сора техникумгъа киреди. Алай аны  бошаргъа бир жыл къалгъанлай, жашны аскерге аладыла. Ол Ленинград тийресинде къуллукъ этип тебирейди. Анда  билимин да ёсдюрюрге кюрешгенди,  офицерлени  ингир школунда окъугъанды.
 
 Кесин иги кёргюзтгени ючюн 3-4-айлыкъ офицер курслагъа жибередиле. Аны бошагъандан сора офицер чын бередиле. Аскерде къал деп да тилейдиле. Болсада жаш юйюне къайтады. Келгенлей, жартылай къалгъан окъууун тауусады, сора Биринчи Чегемни «Элмюлктехника» биригиуюнде урунуп башлайды.
 
Биринчи кезиуден окъуна жаш специалистни ишине эс бура тебирейдиле. Мустафир да, билмегенин таматаладан, сынаулу специалистледен соруп, уста механик болады. Бир аздан а аны инженерге кёчюредиле. Дагъыда бираздан а туугъан эли Хушто-Сыртда колхозну председателине саладыла. Анда тогъуз жыл ишлейди. Анда да эллилерини къайгъыларын унутмагъанды. Жарсыуларына  эс бургъанды. Аланы жашау болумларын къолундан келгенича игилендирирге кюрешгенди. Адамланы жигер ишлерге кёллендиргенди.
 
Андан сора уа Хурту улуну Чегем районну жол-ремонт къурулуш управлениясына тамата этедиле. Ол жылларыны юсюнден биринчи кере Хасауланы Исхакъдан эшитгенме. Ол аны бла ишлеп тургъанды. «Жашаугъа таукел кёзден къарагъан, тутхан ишин чегине жетдире билген, адамлагъа сёзю ётген, къолунда ишлегенле ючюн жарсый билген, чомарт адам эди Мустафир. Аны бла биринчи кере 1987 жылда шагъырей болгъан эдим. Жаш адам болгъанлыкъгъа, тохташхан, ишин билген къуллукъчу эди. Ол заманда Мустафир Чегем районну жол-ремонт къурулуш управлениясыны таматасы эди. Мени уа ары баш инженер этип жибередиле», – дейди Исхакъ.
 
Бу управление район тийресинде эки жюзден артыкъ километр жолгъа къарагъанды. Аладан сексен километри тау элледеди. Къалгъаны уа тюздеди. Жолчула аланы дайым тап  халда тутаргъа керекдиле. Бютюнда тау жерлеринде. Кече бузлата, кюндюз эрите турса, жолгъа таш, зыгъыр къуюлады. Жаз башында къар  эриген кезиуледе неда сакъ жауунладан сора ырхыла келселе, жолланы талайдыла. «Ол кезиуледе бютюнда сакъ бола эди, – дейди Исхакъ. – Кечеле бла окъуна жоллагъа ремонт этген заманларыбыз да болгъандыла. Мустафир жаныбызда туруп ишлеп башлар эди. Ол а адамланы да бек кёллендиргенди».
 
Мустафир малчылыкъны, жерчиликни да бек сюйгенди. Жол-къурулуш управленияда ишлегенинде да малла жайгъанды. Къолунда ишлегенлени эт, сют бла жалчытып тургъанды. Андан сора да, ишчилерине юйле ишлетип да тебирейди. Кёплеге уа къурулуш материалла да мажаргъанды. Ол заманлада уа къурулуш материалла тапхан тынч тюйюл эди.
 
– Мен аны бла бирге тогъуз-он жыл ишлегенме. Ишин да билген, иш кёллю да киши эди. Жашау жолумда аллай адамгъа жолукъгъаныма бек ыразыма. Аргъы дуниясы жаннет болсун, – деп бошайды Хасауланы Исхакъ хапарын.
1996 жылда уа Мустафир Чегем районда адамланы социал жаны бла къоруулау управлениясыны таматасына салынады. Бу ишде да аны тынгысызлыгъы кетмегенди. Жылы кабинетде олтуруп турмай, эллеге жюрюп, адамлагъа жолугъуп, жарсыуларын билирге кюрешгенди. Кемчиликни кёрсе, аны къоратхынчы тынчлыгъы болмагъанды.
 
Алай эте, къайда, къаллай къуллукълада ишлеген эсе да, адамладан ыразылыкъ тапханды, аланы кёп алгъышларын да эшитгенди.
Жашау жолунда юй бийчеси Лейла бла эки жаш, бир къыз ёсдюргендиле. Ала да бирер жерде жашайдыла. Сайлагъан усталыкъларына кёре ишлейдиле.
 
Мустафир кеси уа, къыйын ауруудан сора былтыр дуниядан кетгенди. 
 
Османланы Хыйса.
Поделиться: