Энчи сакъланнган объектлени къоруулау кючленеди

Къырал магъаналы объектлеге законсуз  киргенлеге жууаплылыкъны  къатыландырыргъа белгиленеди.  Федерал законлагъа хазырланнган тюзетиулеге тийишлиликде, энчи сакъланнган къырал объектлеге, коммуникация инфраструктурагъа эркинликлери болмай киргенлеге административ жууаплылыкъ кючленеди. Бузукълукъ къайтарылып этилсе уа, уголовный иш ачылады.

РФ-ни Уголовный кодексине ол жаны бла тюрлениуле   бу кюнледе Къырал Думаны къараууна берилгендиле. Документни ангылатыу бёлюмюне айтылгъаныча, быллай мадарла Украинада бардырылгъан энчи операцияны кезиуюнде къырал объектледе, энчи жюклеге, коммуникация инфраструктурада терроризм бла  байламлы аманлыкъла этилирге къоркъуу ёсгени бла байламлы кийириледиле.

Алай бла Росгвардияны къалауурлары сакълагъан мекямгъа эркинлиги болмай киргеннге  5 минг сом тазир салынады, неда инсан беш кюннге тутулургъа боллукъду. Сёз РФ-ни Сауутланнган кючлерини, къырал власть органланы, право низамны сакълаучу эм кюч структураланы объектлерини юслеринден бара эсе уа, тазир 10 минг сомгъа жетеди. Быллай жууаплылыкъ аскерге мобилизация бла чакъырылгъанланы хазырлау жаны бла федерал органланы объектлерине законсуз киргенлеге да салынады.

Бузукълукъну къайтарып этгеннге уа уголовный жууаплылыкъ кийириледи. Бузукъчуну экинлиги 2 жылдан 4 жылгъа дери сыйырылыргъа боллукъду.

Тикаланы Фатима хазырлагъанды.
Поделиться: