Хыйлачылыкъланы тохтатыр мурат бла

Быйыл 18 мартда 37-ФЗ номерли федерал закон, кючюне кирип, «Сабийлери болгъан юйюрлеге къошакъ къырал болушлукъну юсюнден» федерал законнга  тюрлениуле  кийиргенди.

КъМР-ни прокуратурасындан бизге ангылатханларыча,  алай бла аналыкъ капиталны жашау этерге къоркъуулугъа саналгъан мекямны сатып алыргъа  къоратыргъа эркин этилмейди. Ол санда кёп къатлы юйледе фатарны да.  

 Андан сора да, бу сертификатха кёре ипотека алыргъа жарагъан организацияланы тизмеси да къысхартылгъанды. Энди ол жаны  бла келишимни къырал эсепге тургъан кезиуден бери бек аздан юч жыл ишлеген банкла, кредит потребитель неда эл мюлк потребитель  кооперативле бла этерге боллукъду. Андан сора да, ипотеканы «Дом.РФ» деген акционер обществону болушлугъу бла да алыргъа жарарыкъды, алгъын ол «Ипотека жашау журт кредит агентство» деп белгили эди. 

Битеу бу тюзетиуле хыйлачылыкъланы тохтатыр мурат бла кийирилгендиле. Алай бла сабийлени эркинликлерин сакълау жаны бла гарантияла кючленнгендиле. Бюгюнлюкде уа сертификатны ёлчеми 453 026 сомгъа жетгенди.