Жууапладан эсе соруула асламдыла

Кёп болмай  «Культура» телеканалда  «Искатели. Говорящие мумии Чегемского ущелья»  программа кёргюзтюлгенди.  Экспертлеча анда Къабарты-Малкъар къырал университетни келечилери: вузну илму-излем жаны бла проректору, химия илмуланы  доктору  Светлана Хаширова,  технологияланы трансфер офисини таматасы, физика-математика илмуланы кандидаты  Зашаккуланы Заур,  микробиология, вирусология, иммунология эм  медицина кафедраны таматасы, медицина илмуланы доктору  Заира Хараева эм  социал-гуманитар институтну директоруну орунбасары,  тарых илмуланы кандидаты  Геграланы Хаким сёлешгендиле.

 «Искатели» – къараучуланы  Россейде бла тыш къыраллада магъаналы  эм  сейир шартла бла  шагъырейлендириу программады. Аны келечилери бу жол Чегем тарына келип, буруннгудан къалгъан тасханы ачыкълар муратлыдыла. Анга кёре  «Искатели. Говорящие мумии Чегемского ущелья» съёмкаланы чеклеринде  1767  жылда Чегем ауузуну эллерини биринде адамла сылтаузуз аслам нек ёлгенлерин  билир муратлыдыла.  Алгъын жыллада   жукъгъан ауруу жайылгъан  сунуп, къырал башчыла жиберип,                                                                                               энчи комиссия да къулагъанды.

Болсада, специалистле тинтиуле бардыргъанда,  бир тюрлю  жууап табылмагъанды. Алай бла жууапдан эсе  соруула кёп чыкъгъандыла. Чегемлиле уа  къойчула сёлешген  мумияланы обаларын тонагъанлары ючюн аланы къаргъышлары жетгенине ийнаннгандыла.   Алай Шимал Кавказда  250 жыл мындан алгъада мумияла къайдан чыкъгъан болурла?   Ол да сорууладан бириди.

Ол  соруугъа жууап табарча, тинтиучюле  сагъынылгъан дорбунну излерге  эм адамла неден ёлгенлерини тюзюн  билирге таукелдиле. 

 

 

Курданланы Сулейман.
Поделиться: